Асқар Умаров: "Рақибни жиддий ўргангандик"

Ўйиндан сўнг меҳмонлар бош мураббийи Асқар Умаровнинг фикрлари билан қизиқдик.

- Айтиш керак, учрашувга кўнгилдагидек тайёргарлик кўргандик. Клубимиз раҳбарлари беллашувга муносиб тайёргарлик кўришимиз учун бизга барча шароитларни яратиб берди. Фарғонага ўйиндан икки кун аввал етиб келгандик. Натижасини кўриб турибсиз. Ғалабада жисмоний ҳолатимиз яхши эканлиги ҳам муҳим ўрин тутди. Асосийси, футболчилар майдонга тушганидан кейин биз берган кўрсатмаларни тўлиқ бажаришди.

Умумий маънода ўйин яхши ўтди. Ёзёвонга ғалаба учун келгандик. Чунки рақибни етарлича ўргангандик. Камчиликларини билардик. Якунда мақсадимизга эришдик. Қолаверса, кечаги ўйинда об-ҳаво ҳам футбол ўйнашга қулай бўлди.

Келаси турда "Цементчи"га қарши майдонга чиқамиз. Албатта, рақиб кучли. Улар биринчи турда "Динамо"ни мағлуб этишди, аммо биз ҳам майдонга шунчаки чиқмаймиз. Фақат ғалаба учун ҳаракат қиламиз. Қувасойдаги ўйинда ҳам жамоам уч очкони қўлга киритишини кутяпман.