Асилбек Қаюмов: "Жамоамизни тажрибали мураббий бошқармоқда"

Футболдаги дастлабки билимларимни тажрибали мураббий Саидаҳмад Бурҳоновдан олганман - дейди Асилбек Қаюмов. У киши ёшлигимда ёшлигимда ўзи мураббийлик қилаётган жамоага таклиф этиб, футбол сир-асрорлари ҳақида ўргатганлар. Кейинчалик Фарғона шаҳридаги "Нефтчи" футбол мактаби жамоаси таркибига бориб қўшилдим ва республикамиз миқёсида ўтказилган турли хил мусобақаларда иштирок этдим, тажриба тўпладим.

"Ёзёвон-Лочинлари" футбол клубига футболчи ва мураббий Зокирбек Нурматовни тавсиясига кўра бориб қўшилдим. Бу жамоага келиб қўшилишим билан  тезда киришиб кетдим. "Ёзёвон-Лочинлари" аҳил жамоа экан, футболчилар билан бир оиладекмиз. Илк учрашувларда жамоамиздаги тажрибали футболчилар мени қўллаб-қувватлашди, улардан кўп нарсаларни ўрганмоқдаман.Умуман олганда бу жамоа сафида ўйнаётганимдан хурсандман.

"Ёзёвон-Лочинлари" футбол клуби раҳбарияти ва мураббийлари бизга машғулотлар ўтказиш, футбол ўйнаш учун барча шароитларни яратиб беришмоқда. Биласизлар, жамоамизни тажрибали мураббий - Салимжон Зокиров бошқаради. Бош мураббийимиз бизни янги мавсумга муносиб тарзда тайёрламоқда деб ўйлайман.

Келажакда ўз олдимга Суперлига жамоаларида ўйнаш, насиб қилса миллий терма жамоамиз сафида тўп суришни мақсад қилганман. Насиб қилса мени қўллаб-қувватлаётган мураббийларимни ишончини оқлайман деган умиддаман.

Бекзод Толибов ёзиб олди.