Ўйиндан кейин "Қўқон-1912" бош мураббийи Андрей Шипилов матбуот анжуманида иштирок этди.
- Ўйин ҳақида фикрингиз?
- Фарғона жамоасини ҳақли ғалаба билан табриклайман ва 2026 йилги барча фронтларда жамоага омад тилайман. Бугунги мағлубиятни гапиришга тил ожиз. Мағлубият учун қўқонлик мухлислардан узр сўрайман. Биз ўз ўйинимизни намойиш эта олмадик, характер ҳам кўрсатмадик. Қизил карточка хусусида ҳам гапирмоқчи эмасман. Бунинг учун тегишли ташкилотлар бор ва улар гапиргани маъқул. "Нефтчи"да тажрибали футболчилар йиғилган, уларга қарши осон бўлмади. Олдинда чемпионатнинг яна бир баҳси кутмоқда, тезроқ бу мағлубиятни унутиб шунга тайёрланишимиз керак. Биз ёмон ўйнадик, нотўғри ҳаракат қилдик, ютқаздикми демак ҳаммамиз ютқаздик.
- "Қўқон-1912"да барқарорлик кўринмаяпти. Аввалги турларда жамоа кучли рақиблар билан тенгма-тенг ўйнаб ўртамиёна клубларга мағлуб бўлди. Бу нима билан боғлиқ?
- Навоийдаги баҳсдан кейин ҳам айтиб ўтгандим, биз ўйин борасида шу пайтгача ҳеч бир жамоага ютқазмадик. Ўтказиб юборилган голлар бўйича тўртинчи ё бешинчи ўриндамиз. Орада олти турни мағлубиятсиз ўтказдик. Навоийда тартибли ўйин намойиш этиш кераклигини йигитларга уқтиргандик. Машғулотларда ҳаммаси зўр кетяпти, машғулотларни ёзиб боряпмиз ва таҳлил қилганда ҳаммаси яхши чиқяпти. Лекин охирги иккита сафар баҳсида олтита гол ўтказиб, фақат битта гол урдик. Буни изоҳлаш мен учун қийин.
Олдинги турларда ҳеч кимга эътироз йўқ эди, аммо охирги икки учрашувда нима бўлганини тушунмаяпман. Агар футболчилар яхши шартномага имзо чекиб, буёғига зўр шароитда юраман деб ўйлашса хато бўлади. Менинг ўринимга бошқа мураббий келса ҳам футболчилардан ғалаба қозонишни талаб қилади. Ҳеч бир мураббий кам нарса билан кифояланиб қолмайди. Ҳар бир мураббий кўпроқ ғалабани ва турнир жадвалида юқорида бўлишни истайди. Ҳатто дуранг ўйнаган пайтларимизда ҳам натижадан қониқмадим деганман. Биз ваҳима қилишимиз керак эмас. Тинчгина уйга бориб эртадан кейинги баҳсга ҳозирликни бошлашимиз зарур. Кетма-кет ўйинлар бўлаётганидан хурсандман.
- "Қўқон-1912" таркибида ижарада тўп тепаётган Нимели ва Соҳибжоновлар бугун майдонга туша олишмади. Уларнинг йўқлиги қай даражада таъсир қилди?
- Албатта, бу икки футболчимизнинг йўқлиги билинди. Нимели "Хоразм" билан баҳсда натижа келтирганди. Соҳибжоновда жароҳат бор эди, лекин ҳозир ўзини яхши ҳис қиляпти. Катта ўйинларда ҳар бир етакчининг йўқлиги билинади.
