Андрей Микляев: Азизбек Амонов “юлдузлик касали”га чалинмаслигига умид қиламан

Учрашувдан сўнг ўтказилган матбуот анжуманида “Локо” устози Андрей Микляев қуйидагича фикр билдириб ўтди:

- Учрашув анча кескин курашларга бой тарзда ўтди. Рақиб ҳам асло бўш келмасликка уринди. “Металлург” сўнгги пайтларда мағлубиятга учрамасдан келаётган эди. Лекин биз ушбу жамоани мағлуб эта олдик.

Ўйин осон кечгани йўқ. Айниқса, жамоамизда жароҳат олганлар сони кўп экани ҳам бизга янада қийинчилик туғдирди. Лекин бугун майдонга чиққан йигитлар йўқ ўйинчиларнинг ўрнини билинтирмасликка уринишди.

Бугун ёш футболчи – Азизбек Амонов ўзидан ёмон таассурот қолдирмади. У дебют голини киритишга муваффақ бўлди. Агар у ўз устида ишлашдан тўхтамаса, ундан яхши савиядаги футболчи чиқади. Умид қиламанки, у “юлдузлик касали”га учрамайди.

Умуман олганда, биринчи даврани ёмон ўтказмадик. Бироқ баъзи учрашувларда кутилмаганда керакли очколарни бой бериб қўйдик. Энди иккинчи даврага ҳозирлик кўришни бошлаймиз. Таркибда ўзгаришлар бўлиши мумкин. Ньоре Кризо биз кутгандек ўйин намойиш эта олмади. У билан хайрлашадиган бўлдик, - дейди тажрибали мутахассис.