Алишер Шоғуломов: "Кейинги мавсумда таркибда катта ўзгаришлар бўлади"

"Биласиз, жамоамиз тизимида катта ўзгаришлар юз берган. Асосий ўйин услубимиз тўп назоратини сақлаш ва қисқа паслар билан ҳаракат қилишни сақлаб қоламиз. Йўқотадиган нарсамиз йўқлиги боис ҳар бир ўйинда турли ўзгаришларга қўл уряпмиз. Турли тактикаларни синовдан ўтказяпмиз. Натижа биз учун муҳим эмас. Ўйин давомида 2-3 та ҳужумчи билан ҳаракат қиляпмиз. Умумий қилиб айтганда кейинги мавсумга тайёргарлик олиб боряпмиз",- дейди Алишер Шоғуломов.

- Жамоа дастлабки 15-20 дақиқада кўп бор ноаниқ пасларни амалга оширди ва рақибнинг ўйинига мослашиб қолгандек кўринди...
- Балки, чарчоқ аломатлари билан боғлиқ бўлиши мумкин. Мавсум охирида ҳеч бир жамоа жисмоний жиҳатдан юз фоиз тайёр бўлмайди. Пандемия бўлди, тўхталишлар, танаффуслар ўз таъсирини ўтказди.

- Шундай мураббийлар бўладики, услуби ва фалсафаси тезда натижа беради. Баъзи мураббийларнинг услуби эса секин натижа олиб келади. Жамоада фаолият олиб бораётган испаниялик мураббийга бу борада қандай изоҳ бера оласиз?
- Тез натижа кўрсата оладиган мураббийга футболчилар ҳам шу даражада бўлиши керак. Оралиқдаги танаффусда еттита етакчи футболчиларимизни қўйиб юбордик. Уларнинг ўрнига ҳеч кимни таклиф қила олмадик. Қишда таркибда катта ўзгаришлар бўлади. Ҳозирги вақтда олти нафар янги футболчи билан шартнома имзоладик. Ўйлайманки, кейинги мавсумда бошқача футбол кўрсатамиз.