Алишер Шоғуломов: "Ҳакамлар хусусий клубларни "кўмишмоқда". Бу биринчи марта эмас"

"Олимпик" жамоасини ғалаба билан табриклайман! Яхши шаклланган ёш жамоа. Яхши мураббий ишламоқда. Тўғрисини айтсам бу жамоага ҳам мухлислик қиламан.

Лекин ҳакамлар ҳақида гапирмоқчиман, кечириб бўлмайдиган ҳолатлар бўлмоқда. Яқинда "Турон" билан ўйиндаги вазият такрорланмоқда. Ҳакамларга нисбатан нимадир қилишсин, натижа бўлсин! Майли бу баҳона эмас, ўзимизни хатолар туфайли голлар ўтказдик. Кимдир уларга нимадир дейиш керак. Ҳакамлар хоҳлаган ишини қилмоқда... Ўтган турда ҳам "Бухоро" билан баҳсда рақиб футболчиси тирсаги билан бизнинг ўйинчига зарба бермоқда, ҳакам буни кўрмаяпти. Бу тоза пенальти эди... Майли ишлашда давом этамиз ва хатоларни тўғрилашда давом этамиз. Мана шундай ўйинлар кўпайгани яхши, стадион зўр, муҳит зўр, футбол ўйнаш керак холос", - деб гап бошлади Алишер Шоғуломов.

- Жамоа яхши ҳужум қилмоқда, аммо нимадир етишмаяпти...
- Ҳужумларни якунлашда камчиликларимиз бор тўғри. Бунинг устида ишлаймиз.

- Таркибга ўзингиз истаган барча футболчиларни жалб қила олдингизми?
- Ўзимизни чақирган футболчиларни жалб қила олмадик. Бизда "Нефтчи" ёки "Бухоро"дек молиявий имкониятимиз зўр эмас. Кўп футболчилар келишмади. Легионерларни қўшиб олдик, бразилиялик, колумбиялик футболчилар. Улар ҳали максимал формага киришмаган, машғулотларда ишлашади ва жамоага қўшилиб кетишади.

- Ҳакамларга эътирозингиз айнан қайси вазиятлар учун?
- Биринчи таймда жарима тўпини амалга оширганимизда менимча гол бўлганди, яна бир вазиятда рақиб футболчисининг қўлига тўп тегди, ҳакам пенальти қўймади. 3-4та вазиятда ўйиндан ташқари ҳолатни нотўғри аниқлашди. Ҳакамлар жонга тегишди. Ўтган ўйинда ҳам шундай вазиятлар бўлди. Хусусий клубларни ҳакамлар "кўмишмоқда". Бу биринчи марта эмас. Балки ҳакамларга хусусий клублар ёқмас, билмадим", - дейди Алишер Шоғуломов.