Алишер Латипов: "Қўқон-1912" билан тенгма-тенг ўйнашга интилдик, аммо омад "Юниред" томонда бўлмади"

"Нима ҳам дердим, "Қўқон-1912" жамоасини ғалаба билан табриклайман. Биринчи бўлимда хатолар туфайли иккита гол ўтказиб юбордик. Иккинчи таймда вазиятни ўзгартиришга интилдик, аммо омад биз томонда бўлмади. Гол уриш учун етарлича вазиятлар бўлганди. Рақиб билан тенгма-тенг ўйнашга интилдик.

Футболчиларнинг майдондаги ҳаракатини кўриб, таҳлил қиламиз. Битта шижоатнинг ўзи билан ўйнаш етарли эмас. Бугун аксарият ўйинчилар, аниқроғи, 1-2 нафар футболчимиз кўрсатмани бажара олмади. Шу боис иккинчи таймда ўзгаришлар қилиб, вазиятни тўғрилашга ҳаракат қилдик. Аммо гол уриш учун омад келмади. 

Амиржон Сафаров? У аслида ҳужумчи саналса-да, уни чап қанотда ўйнатяпмиз. Амир ҳали ўзини кўрсатишига ишонаман. Жамоамиз, таркибимиз янгилиги учун йигитларнинг бир-бирини янада яхшироқ тушуниши учун ҳам ҳали яна вақт талаб этилади. Мағлубиятга қарамай, жамоамизни қўллаб-қувватлаган мухлисларга раҳмат айтмоқчиман", – деди "Юниред" бош мураббийи Алишер Латипов.