Матия Кривокапич: "Ғалабадан ҳамма хурсанд, лекин эртага янги кун бошланади"
18 авг 15:20
Янгиликлар

Матия Кривокапич: "Ғалабадан ҳамма хурсанд, лекин эртага янги кун бошланади"

Суперлиганинг 19-туридан ўрин олган "Бунёдкор" – "Бухоро" (2:1) учрашувидан сўнг мезбонлар ҳужумчиси Матия Кривокапич ўз фикрлари билан ўртоқлашди.

- Ўйин ҳақидаги таассуротларингиз билан ўртоқлашсангиз...

- Ҳиссиётларим жуда кучли. Бахтлиман, лекин ҳис-туйғуларим шунчалик кучлики, гапиришга сўз тополмаяпман. Энг муҳими, ғалаба учун хурсандман.

- Бугун "Бунёдкор" таркибидаги илк голингизни урдингиз. Бу гол сиз учун қанчалик аҳамиятга эга?

- Мен учун бу жуда муҳим. Ҳаммамиз хурсандмиз, лекин эртага янги кун бошланади, кейинги ўйин бор, шу боис янги вазифалар устида ишлашимиз керак.

- Сиз эндигина 22 ёшни қарши олгансиз. Нима учун Европа клублари ўрнига "Бунёдкор"ни танладингиз?

- Нима дейишни билмайман. Менимча, бу лига жуда яхши, бу ерда ўсишим мумкин ва буни вақт кўрсатади. Кўп гол уришга ҳаракат қиламан, нима бўлишини вақт кўрсатади.

- Жамоага мослашишингизга кимлар кўпроқ ёрдам беряпти?

- Жамоада Болқон мамлакатларидан келган ўйинчилар бор, кўпинча улар билан вақт ўтказаман. Лекин жамоадаги барча шериклар менга жуда яхши муносабатда, шунинг учун мослашиш осон бўлмоқда. Тошкент ҳам ажойиб шаҳар.