Ўзбекистон U-19 Венгрия ёшлар терма жамоаси билан ўртоқлик ўйинини ўтказади

ЎФФ Терма жамоалар маркази берган маълумотга кўра томонлар ўзаро келишувга эришган ва июль ойи бошида Ўзбекистон U-19 ёшлар терма жамоаси Венгриядаги ўқув-машғулот йиғини давомида Венгрия U-19 ёшларига қарши иккита ўртоқлик ўйинида майдонга тушади.

Шу йилнинг октябрь ойида Мьянмада бўлиб ўтадиган ёшлар ўртасидаги Осиё Чемпионати финал босқичига тайёргарлик кўраётган Ўзбекистон U-19 ёшлар терма жамоаси июль ойи дастлабки ўн кунлигида Венгрияда ўзининг навбатдаги ўқув-машғулот йиғинини ўтказади. Мазкур йиғин давомида Ўзбекистон U-19 ёшлар терма жамоаси Венгрия U-19 ёшларига қарши 8 ва 11 июль кунлари ўртоқлик-назорат ўйинларини ўтказади. Иккала ўйин ҳам Будапештдаги «Глобал Спорт» мажмуасида бўлиб ўтади.

Таъкидлаш жоиз, айни дамда терма жамоани катта мураббий Илҳом Мўминжонов шуғуллантирмоқда. Сергей Лушан терма жамоани тарк этгач, ундан қолган вакат ўринга номзодлар орасидан янги мураббий номи тез кунларда эълон қилинади.