"Локомотив" кундалиги: Абу Дабидаги учинчи кун. Эрталаб назарий, кечки пайт амалий

Кеча икки маҳал майдонда шуғулланган "темирйўлчилар"нинг бугунги иш тартиби бироз бошқача кечди. 

Футболчилар дастлаб тушгача назарий машғулотда иштирок этишди. Бунда жамоа бош мураббийи футболчиларнинг машғулотдаги ҳаракатларини видеоёзув орқали кўрсатиб берди. Хатолар айтилди ва уларни тўғрилаш йўллари кўрсатилди. Шуни айтиш лозим, ҳимояланувчилар ва ҳужум қилувчилар учун иккита алоҳида назарий дарс ташкил этилди.

Кечки пайт жамоа аъзолари дастлаб тренажёр залида шуғулланиб, сўнгра майдонга чиқишди. Майдондаги машқлар тўп билан ишлаш ва тактик тўғри ўйнашга қаратилди. "Локо" эртага икки маҳал майдонда шуғулланади. Мураббийларнинг айтишича, эртанги машғулот бирмунча қийин бўлади.

Абу Дабида йиғин ўтказаётган "Локомотив" таркибида уч нафар дарвозабон шуғулланяпти. Булар - Игнатий Нестеров, Жавоҳир Илёсов ва Рустам Нартажиев. 

Айтиш мумкинки, тажрибали дарвозабонлар мураббийи Пётр Гизимчук қўл остида ҳар учала дарвозабон ҳам астойдил меҳнат қилмоқда. Машғулотлар давомида маҳоратли Нестеров ўз тажрибасини ёшлар билан бўлишмоқда.