Кучли-бешлик: Тур таҳлили (АПЛ, Ла Лига, Бундеслига, А Серия, Франция 1 дивизиони)
25 сен 2017 18:39
Новости
![](https://championat.asia/upload/storage/279676_original.jpg)
![](/upload/storage/279676_220.jpg)
Кучли-бешлик: Тур таҳлили (АПЛ, Ла Лига, Бундеслига, А Серия, Франция 1 дивизиони)
Англия премьер лигаси ва Ла Лигада бугун тунда турнинг сўнгги ўйинлари ўтказилади.
Кучли-бешлик чемпионатларида ўтган ҳафтада бир қатор қизиқарли учрашувлар бўлиб ўтди.
Англия премьер лигасининг 6-турида кутилганидек етакчилар ғалаба қозонишди. Турнир пешқадамлари Манчестернинг икки клуби ўз "чўнтаги"га навбатдаги 3 очкони қўшиб қўйди. Гвардиола шогирдлари "Кристал Пэлас"га ҳеч қандай имконият қолдиришмаган бўлса, Моуринью бошчилигидаги "Юнайтед" "Саутгемптон" сафаридан ғалаба билан қайтишди.
Уларни қуваётган "Челси" эса меҳмонда Моратанинг хет-триги эвазига "Сток Сити"ни ранжитди. "Ливерпуль" ҳам драматик ўтган ўйинда "Лестер"дан устун келди.
Лондонда эса "Тоттенхэм" шаҳардошлари "Вест Хэм"ни мағлубиятга учратишни уддасидан чиқишди.
Турнир жадвалининг пастки қаторига тушиб кетган "Арсенал" эса бугун турни якунлаб қўяди.
Тўпурарлар баҳсида ҳам кураш анча қизғин кечмоқда. Мората "Челси"даги илк хет-тригини нишонлади. Лукаку гол уришни давом эттирмоқда. Харри Кейнни куз фаслида тўхтатишни иложи бўлмаяпти. Агуэро ҳам деярли ҳар учрашувда ўз номини таблога ёздириб қўймоқда. "Ливерпул"нинг янги аъзоси Салах ҳам гол таъмини яхши ҳис этиб олган.
Турнир жадвалида эса бу турдан кейин ўзгаргани йўқ. Пешқадам ва етакчилар ўз жойларида қолишди. Гвардиола жамоаси ўтган мавсумни ҳам шундай кўтаринки кайфиятда бошлаганди. Аммо 7-турда "Сити"ни Лондонда тўхтатишганди. Ўшанда "Тоттенхэм" Гвардиола жамоасини мағлуб этганди. Кейинги турда эса "Сити" яна Лондонга, бу сафар "Челси"га сафар уюштиради. Яна ўша сценарий такрорланадими? Буни вақт кўрсатади.
АПЛ 6-тур рамзий терма жамоаси (3-4-3):
Дарвозабон: Матью Райан ("Брайтон")
Ҳимоячилар: Аспиликуэта ("Челси"), Кристофер Шайндлер ("Хаддерсфилд"), Фил Жонс ("Манчестер Юнайтед")
Ярим ҳимоячилар: Жордан Хендерсон ("Ливерпуль"), Давид Силва ("Манчестер Сити"), Лерой Сане ("Манчестер Сити"), Ричарлисон ("Уотфорд")
Ҳужумчилар: Альваро Мората ("Челси"), Харри Кейн ("Тоттенхэм"), Байе Оумар Ниассе ("Эвертон")
Италия А Сериясида ҳам пешқадамлар бу турда муваффақият қозонишди. "Ювентус" Турин дербисида йирик ғалабани тантана қилган бўлса, "Наполи" "СПАЛ"ни уйида анча қийналди, аммо шунга қарамай неаполликлар муҳим ғалабага эришишди.
"Интер" ҳам ўтган турдаги муваффақиятсизликдан кейин ўзларига келишди. Спалетти шогирдлари қийинчилик билан "Женоа" қаршилигини енгишни уддасидан чиқишди.
"Рома" эса Римда "Удинезе"ни ортиқча қийинчиликсиз доғда қолдирди.
"Лацио" ҳам бу турда Чиро Иммобиленинг голлари эвазига "Наполи"дан учралган мағлубият аламини "Верона"дан олишги муваффақ бўлди.
Турнинг кутилмаган натижасини "Милан" қайд этди. "Сампдория" меҳмони бўлган Винченцо Монтелла қўл остидаги "Милан" рақиблари дарвозасини ишғол этиш тугул бирорта аниқ зарба ҳам беролмади. Натижада Сапата ва Алварез киритган голлар туфайли "Сампдория" ғалабага эришди. Шу тариқа мезбонлар ушбу мавсумдаги мағлубиятсиз серияларини давом эттиришди.
Тўпурарлар пойгасида мавсумни ажойиб бошлаган Дибала карвонбошчилик қилмоқда. Пауло Дибала ўтказилган 6та ўйинда жами 10та гол уришни уддасидан чиқди.
Иккинчи поғонада бораётган Чиро Иммобиле ҳам Дибалага жиддий кураш таклиф этмоқчи.
Турнир жадвали деярли ўзгаришларсиз қолди. "Наполи" ва "Ювентус" қўшпешқадамликни давом эттиришмоқда. "Интер" эса уларни қувувчи ролида. "Лацио", "Рома", "Милан" ва "Сампдория" эса кетма-кетликда жой олишган.
Эслатиб ўтамиз, "Рома" ва "Сампдория" бу жамоаларга нисбатан битта кам ўйин ўтказган.
А Серия 6-тур рамзий терма жамоаси (4-3-3):
Дарвозабон: Стефано Соррентино ("Кьево")
Ҳимоячилар: Файзи Гулям ("Наполи"), Луиз Фелипе ("Лацио"), Филип Эландер ("Болонья"), Данило Д`Амбросио ("Интер")
Ярим ҳимоячилар: Лукас Торрейра ("Сампдория"), Миралем Пьянич ("Ювентус"), Андреа Барберис ("Кротоне")
Ҳужумчилар: Эль-Шаарави ("Рома"), Чиро Иммобиле ("Лацио"), Пауло Дибала ("Ювентус")
Испания примеросининг ушбу турида "Барселона" жамоаси Каталония дербисида рақибининг автоголлари ҳамда Суареснинг биргина аниқ зарбаси эвазига йирик ғалабани тантана қилди ва турнир жадвалида ўз пешқадамлигини янада мустаҳкамлади.
Турнинг марказий ўйинида эса "Атлетико" "Севилья"ни ишончли тарзда мағлуб этди ва иккинчи ўринга кўтарилиб олди.
"Реал" эса "Алавес" билан тўқнаш келди ва Даниель Себальоснинг "дубл"и" "қаймоқрингликлар"га муҳим 3 очкони келтирди. "Бетис"га қарши муваффақиятсизликдан кейин ушбу ғалаба Зидан шогирдлари учун жуда муҳим эди.
Валенсия" эса "Реал Сосьедад"га қарши ўтган сафар ўйинида характер кўрсатди ва муҳим 3 очкони ўз ҳисобига ёздириб қўйди. Мавсумни супер ўтказаётган "Леванте" эса бугун тунда турни якунлаб берувчи ўйинда "Реал"ни мағлуб этган "Бетис" меҳмони бўлади.
Турнир жадвалида йўқотишларсиз кетаётган "Барселона" якка ҳокимга айланган. "Атлетико" эса уларни таъқиб этмоқда. Кучли учталикни "Севилья" ёпиб турибди. "Реал" эса "Алавес" устидан қозонилган ғалабадан сўнг 5-поғонага кўтарилиб олди.
Тўпурарлар баҳсида Месси ҳозирча 9та гол билан якка пешқадам. Уни энг яқин рақобатчиси Симоне Дзадза ҳисобида 5та гол мавжуд.
Ла Лига 6-тур рамзий терма жамоаси (4-3-3):
Дарвозабон: Иван Куеллар ("Леганес")
Ҳимоячилар: Луис Фелипе ("Атлетико"), Кала ("Гетафе"), Густаво Кабраль ("Сельта"), Уго Малло ("Сельта")
Ярим ҳимоячилар: Гонсало Гуедес ("Валенсия"), Рубен Перез ("Леганес"), Даниель Себальос ("Реал")
Ҳужумчилар: Анхель Родригез ("Гетафе"), Антуан Гризманн ("Атлетико"), Херард Морено ("Эспаньол")
Франция чемпионатининг бу турида ПСЖ кутилмаганда очко йўқотди. "Монпелье"га Неймарсиз борган парижликлар рақиб дарвозасига йўл топа олишмади. Натижада Унаи Эмери жамоаси қимматли 2 очкони йўқотди.
"Монако" эса "Лилль" меҳмони бўлиб мезбонларни тўртта гол билан сийлади ва турнир жадвалида ПСЖга яқинлашиб олди. "Бордо" ҳам ушбу мавсумни жуда кўтаринки руҳда ўтмоқда. Ҳали мағлубиятга учрамаган ушбу жамоа ўтган турда "Генгам"ни мағлуб этди ва турнир жадвалида кучли учталикка кириб олди.
Тўпурарлар пойгасида Радамель Фалькао қолган футболчилардан анча илгарилаб кетган. Колумбиялик ҳужумчи ҳисобида 11та гол бор ва энг яқин таъқибчиси Каванидан 4та гол кўп урган.
Франция чемпионати 7-тур рамзий терма жамоаси (4-3-3):
Дарвозабон: Бенжамин Лекомте ("Монпелье")
Ҳимоячилар: Йорге ("Монако"), Ромаин Женевойс ("Кан"), Кристофе Херелле ("Тройес"), Ферланд Менди ("Лион")
Ярим ҳимоячилар: Санхаре ("Бордо"), Хоссем Аоуар ("Лион"), Флориан Таувин ("Марсель")
Ҳужумчилар: Лукас Окампос ("Марсель"), Радамель Фалькао ("Монако"), Марио Балотелли ("Ницца")
Бундеслигада ушбу турда кутилмаган натижа қайд этилди. Мавсумни жуда бўш бошлаган ва бош мураббийини истеъфога чиқарган "Вольфсбург" Мюнхенда Шмидт қўл остида "Бавария"дан очко олиб қайтди. Бу эса турнинг энг сенсацион натижаси бўлди. Голларга бой ўтган учрашувда "Бавария" биринчи бўлимда масалани деярли ҳал этгандек таассурот қолдирган. Аммо танаффусдан кейин "бўрилар" Нойерни ўринбосари Свен Ульрайхнинг жарима зарбасидан кейинги қўпол хатосидан кейин ҳисобни қисқартиришга эришишди. Учрашув якунланишига оз фурсат қолганида эса Дидави захирадан майдонга тушиб жамоаси учун муҳим голни урди ва "Вольфсбург" Мюнхендан очко билан қайтадиган бўлди.
Пешқадам Дортмунд эса ўз уйида Мёнхенгладбахнинг "Боруссия" жамоасини меҳмон қилди. Максимилиан Филипп ва Обамеянгнинг бенефисига айланиб кетган баҳсда Петер Бошш жамоаси Хеккингни "қўшини"ни тор-мор келтирди. Шунингдек, ушбу ўйинда Роман Бюрки дарвозаси ушбу мавсумда Штиндль томонидан илк бор ишғол этилди.
Ёш мутахассислар тўқнашувида Нагельсманн Тедескони ишончли тарзда мағлуб этди.
"Кёльн" эса ушбу турда жорий мавсумдаги ўзининг илк очкосини қўлга киритди. "Ганновер" меҳмони бўлган Штогер жамоаси дуранг қайд этди.
Турнир жадвалида Дортмунднинг "Боруссия" жамоаси ишонч билан якка пешқадамлик қилмоқда. "Хоффенхайм" эса иккинчи поғонадан ўрин олган. Кучли учталикни эса бу турда ўз уйида очко йўқотган "Бавария" тугатиб турибди.
Тўпурарлар беллашувида кутилганидек Левандовски ва Обамеянг кураши анча қизимоқда. Бу турда хет-трик қайд этган габонлик ҳужумчи Роберт Левандовскидан ўтиб кетди.
Уларга эса "Лейпциг" ҳужумчиси Тимо Вернер рақобат туғдиришга уринмоқда.
Бундеслига 6-тур рамзий терма жамоаси (4-4-2):
Дарвозабон: Оливер Бауманн ("Хоффенхайм")
Ҳимоячилар: Жереми Тольян ("Боруссия" Д), Никлас Мойсандер ("Вердер"), Абдоу Диалло ("Майнц"), Стивен Цубер ("Хоффенхайм")
Ярим ҳимоячилар: Леон Балей ("Байер"), Максимилиан Арнольд ("Вольфсбург"), Юлиан Вайгль ("Боруссия" Д), Максимилиан Филипп ("Боруссия" Д)
Ҳужумчилар: Кевин Фолланд ("Байер"), Пьер-Эмерик Обамеянг ("Боруссия" Д)
Похожие новости
![AMP Logo](https://championat.asia/image/logo-amp.png)
Комментарии