Женнаро Гаттузо: "Ҳисоб 2:1 пайтида "Милан" йўқ бўлиб қолди"
26 авг 2018 07:26
Новости

Женнаро Гаттузо: "Ҳисоб 2:1 пайтида "Милан" йўқ бўлиб қолди"

“Милан” клуби бош мураббийи Женнаро Гаттузо А Сериянинг 2-туридан ўрин олган “Наполи”га қарши ўйин ҳақида фикр билдирди.

Неаполдаги “Сан-Паоло” стадионида кечган драматик учрашувда меҳмонлар 2:0 ҳисобида олдинда бора туриб, якунда мағлубиятга учрашди.

“Ҳисоб мезбонлар фойдасига 2:1 кўринишига келганидан кейин биз шунчаки майдондан йўқ бўлиб қолдик. Ҳамма ўз хоҳлаганича ва билганича ўйнай бошлади. Футболчиларимиз биринчи хатонинг ўзидаёқ ўзларини йўқотиб қўйишди.

Мағлубият учун барча айб ва жавобгарликни ўз зиммамга оламан. Чунки футболчининг майдонда қўрқиб ҳаракат қилаётгани бу мураббийнинг айби. Ўтган мавсумда ҳам худди шундай ҳолат кузатилганди. Икки тўп фарқи билан олдинда бора туриб, якунда мағлубиятга учраш жуда аламли”, - деди Гаттузо Football Italia нашрига берган интервьюсида.

Эслатиб ўтамиз, “Наполи” 6 очко билан турнир жадвалида 2-ўринни эгаллаб турибди. “Милан”да эса ҳали очко йўқ ва жамоа 13-поғонадан жой олган.