JCH-2014. Xorvatiya - Meksika. PREVYU

Xorvatiya bugun keyingi bosqich masalasini hal qilish maqsadida Meksika bilan bellashib ko'radi. Pley-offga chiqishga har ikkala jamoa ham haqli, biroq kim chiqishini bugungi o'yin yakunida bilib olamiz. Xorvatlar o'tgan tur Kamerunga qarshi juda yaxshi o'yin ko'rsatishdi. Hisobning 4:0 bo'lgani ham Xorvatiyaning qanday kuchga ega ekanligini aytib turibdi.



Biz uchun muhimi shundaki, mazkur jamoalar o'rtasidagi bahsni hamyurtimiz Ravshan Ermatov boshqarib boradi. Niko Kovach shogirdlari Meksikaga ham qandaydir sovg'a tayyorlab qo'yishganmi? Katta ehtimol bilan Meksikaga qarshi Kamerun bilan o'yindagi tarkib harakat qiladi. Har holda xorvatlar ustozi g'oliblarni almashtirmasa kerak. Faqat Kovachich o'rniga Sammir tushishi mumkin.

O'tgan turda Braziliya bilan durang o'ynab o'ziga xos shov-shuvni yuzaga keltirgan Meksika ham anoiylardan emas. Bu jamoa ustozi ketma-ket ikki o'yindan beri bir xil tarkibni tushirmoqda. Murabbiy bu gal ham shunga sodiq qolsa kerak.



JCH-2014. “A” guruhi. 3-tur
XORVATIYA – MEKSIKA
Resifi. “Pernambuku” stadioni
Bosh hakam: Ravshan Ermatov (O'zbekiston)

Taxminiy tarkiblar

Xorvatiya: Pletikosa - Srna, CHorluka, Lovren, Pranich - Modrich, Rakitich - Perishich, Sammir, Olich - Manjukich

Meksika: Ochoa - Agilar, Rodriges, Markes, Moreno, Layun - Vaskes, Errera, Guardado - Dos Santos, Peralta

Jarohat olganlar: yo'q
Diskvalifikaciya: yo'q



Niko Kovach (Xorvatiya termasi bosh murabbiyi):
“Meksika bilan kechadigan o'yin finalga teng bahs bo'ladi. Meksika - kuchli jamoa, lekin o'z navbatida biz ham kuchsiz emasmiz. Meksikaning hujumi ajoyib, ammo ularning himoyasida muammolar bor. Biz esa mana shundan foydalanishga urinib ko'ramiz”.

Migel Errera (Meksika termasi bosh murabbiyi):
“Agar g'alabani ko'zlab harakat qilmasak, biz uchun hammasi yomon tugashi mumkin. Boshini yaxshi boshladikmi, oxirigacha shunday ketishini xohlaymiz. O'z o'yinimizni o'zgartirish niyatida emasmiz”.

Qiziqarli faktlar
-   Meksika ketma-ket beshta jahon chempionatida guruhdan chiqib kelmoqda
-   Evropa vakillari bilan 30ta uchrashuv o'tkazgan Meksika shundan ettitasida g'alaba qozongan
-   Xorvatiya termasi JCH o'yinlarida bungacha guruhning oxirgi uchrashuvida hech qachon zafar quchmagan

X.Xoliqov tayyorladi.