JCH-2014. Portugaliya - Gana. PREVYU

Keyingi bosqichga chiqish uchun Portugaliyada ham, Ganada ham imkoniyat bor. Faqat ulardan birining keyingi bosqichga yo'l olishi narigi o'yinga ham bog'liq. Har ikkala jamoa o'rtasidagi bahs “Garrincha” nomli stadionda bo'lib o'tadi. Portugaliya keyingi bosqichga yo'l olishi uchun avvalo Ganani yirik hisobda mag'lub etishi shart, qolaversa, narigi uchrashuvda Germaniya AQSH ustidan zafar quchishi talab etiladi.



Ko'rib turganingizdek, Portugaliyaning taqdiri o'z qo'lida emas. Jamoa ikki o'yinda o'z darvozasidan 6ta to'p o'tkazib yubordi. Bu esa Portugaliya uchun ko'p deganidir. SHunga qaramay, Krishtianu Ronaldu jamoadoshlari keyingi bosqich haqida qayg'urishmoqda. Buning ustiga Ronalduning sog'lig'ida hamon muammolar bor va uning yuz foizga tayyor bo'lib maydonga tushishi mushkul.

Portugaliya darvozasini bugun Rui Patrisiu o'rniga Betu qo'riqlasa kerak. CHap qanot himoyasida esa Velozu o'ynaydi. Hujumda Eder to'p tepadimi? Bu ham so'roq ostida turibdi. Maydon markazida esa Villiam Karvalyuning harakat qilishi kutilmoqda. Portugaliya muxlislari uchun quvonchli xabar shuki, Pepe maydonga qaytadi va himoya markazida Rikardo Koshta bilan birgalikda o'ynaydi.



JCH-2014. G guruhi. 3-tur
PORTUGALIYA - GANA
Bosh hakam: Navaf SHukrulla (Bahrayn)

Taxminiy tarkiblar

Portugaliya: Betu - Joau Pereyra, Pepe, Rikardu Koshta, Velozu - Villiam, Raul Meyrelesh, Joau Moutino - Nani, Eder, Ronaldu

Gana: Dauda - Afful, Boye, Mensa, Asamoa - Rabiu, Badu - Adoma, A.Ayyu, Atsu - Gyan

Jarohat olganlar: Fabiu Koentrau, Ruy Patrisiu, Ugu Almeyda, Andre Almeyda, Poshtinga - Opare
Diskvalifikaciya: Muntari (Gana)



Kvesi Appia (Gana termasi bosh murabbiyi):
“Ronalduga o'yin bermasdan o'ynashimiz kerak. Biz Portugaliyani to'liq o'rganib chiqdik, birgina Ronalduni emas, balki butun jamoani. Keyingi bosqichga chiqishimiz oson bo'lmaydi, lekin buni uddalay olamiz”.

Paulu Bentu (Portugaliya termasi bosh murabbiyi):
“Avvalo biz ishtiyoqni saqlab qolishimiz lozim. Terma jamoada o'ynar ekansan, bor kuch bilan harakat qilishingga to'g'ri keladi. Garchi turnirni erta tark etsak ham. Imkoniyat bor ekan, oxirigacha kurashamiz”.

Qiziqarli fakt
-   Portugaliya jahon chempionatlarida oxirgi to'qqizta uchrashuvning faqat bittasida g'alaba qozondi (KXDR ustidan 7:0 hisobida)


Xayrulla Xoliqov tayyorladi.