Yoshlar terma jamoasi mashg'uloti va o'yini

Futbolchilar dastlab o'yin oldidan engil chigal yozdi mashg'ulotini olib borishdi. Darvozabonlar bilan Marat Galimov shug'ullangan bo'lsa, futbolchilarni ikki guruhga bo'lgan holda Ilhom Mo'minjonov shug'ullantirdi. Ravshan Haydarov esa o'yinchilarning harakatlarini yuqoridan turib kuzatdi. U har bir futbolchi haqida to'liq taassurotga ega bo'lish uchun mashg'ulot va o'zaro o'yinni diqqat bilan kuzatib bordi.

Futbolchilar yangi murabbiy qo'l ostida ilk bor yig'inda ishtirok etayotganlari bois o'zlarini ko'rsatishga urinishdi. Ikkiga bo'lingan holda o'tkazilgan uchrashuvda bu holat yaqqol ko'zga tashlanib turdi. Futbolchilar jamoaviy o'yindan ko'ra o'z harakatlariga ko'proq urg'u berishdi. Natijada bahsda keskin to'qnashuvlar ko'p kuzatildi, yoshlar bir-birlarini ayamasdan kurash olib borishdi. SHu bilan birga bellashuvda aqlli harakatlar ko'p bo'ldi deyish qiyin. Bir himoyachi bilan uch nafar hujumda ishtirok etayotgan futbolchi qolgan vaziyatlarda hamt to'pni sherigiga etkazib bermay, darvoza tomon o'zi zarba yo'llash kabi holatlar ko'p uchradi. Albatta, har bir futbolchi yangi murabbiyga nimalarga qodir ekanligini isbotlashni istaydi. Haydarov tajribali mutaxassis va u vaziyatni tez orada o'nglashiga umid qilamiz.

"Qizillar" va "ko'klar" uchrashuvida dastlab qizil rangli jiletkalarda o'ynagan jamoa vakillari ikki to'p kiritishdi. Dastlab birinchi bo'lim oxirida Ibrohim Abdullaev penaltidan unumli foydalandi. Ikkinchi bo'limda Ravshan Xursanov qizil liboslilarning ikkinchi to'piga mualliflik qildi. O'yin oxirlarida "ko'klar" 2 daqiqada 2 gol urishdi. Javohir Sidiqov hisobni qisqartirgan bo'lsa, Eldor SHomurodov muvozanatni tikladi. SHunday qilib, yoshlar termasining 2 tarkibga bo'lingan holda o'tkazgan bahsi 2:2 hisobida yakunlandi. SHanba kuni kechqurun esa jamoa Turkiya orqali Vengriya poytaxtiga jo'nab ketdi.


Behzod Nazarov.