Yaponiyalik jurnalist: "Menimcha, ikkala jamoa ham Avstraliyaga duch kelmaslik uchun o'ynaydi"

O'zbekiston terma jamoasi Yaponiyaga qarshi maydonga tushadi. O'yin boshlanishiga sanoqli daqiqalar qolayotgan bir paytda yaponiyalik hamkasbimiz, "Asahi TV" muxbiri Yota Nagaxatani suhbatga tortdik.

- O'yin startiga juda oz vaqt qoldi. Qanday taxmin bildirasiz?
- Ikkala jamoaning asosiy tarkibida o'zgarishlar borligini ko'rdim. SHunga qaramay, bahs qiziqarli kechadi deb o'ylayman. Bu o'yinda guruh peshqadami kim bo'lishi malum bo'ladi. Menimcha, zaxira variantidan kim yaxshi foydalansa, o'sha yutib ketadi. O'ylaymanki, Yaponiyada g'alabaga bo'lgan imkoniyat ko'proq. Buni yapon bo'lganim uchun aytmayapman, balki jamoalarning kuchidan kelib chiqib aytdim. Bazi futbolchilar avvalgi o'yinda ishtirok etishmadi va ular bugungi o'yinga tayyor. SHunchaki taxmin qilaman: bugungi bahsda har ikki jamoa ham keyingi bosqichdagi raqib Avstraliyadan qochish uchun o'ynaydi. CHunki Avstraliya juda kuchli raqib.

- Yaponiya terma jamoasining boshlang'ich tarkibi haqida nima deya olasiz?
- Ikkita o'yindagi g'alabadan so'ng tarkibda o'zlgarishlar bo'lishi kutilgandi. 10 nafarga yaqin futbolchi almashgan. Menimcha, bu o'zgarish ham bizning g'alabaga bo'lgan imkoniyatimizni susaytira olmaydi. Bizda ikkita kuchli tarkib bor.

- Yaponiya termasi tarkibida bugun kim o'zini ko'rsatishi mumkin?
- 14-raqam (Junya Ito), 13-raqam (Yoshinori Muto) va 10-raqam (Takashi Inui)dan ko'p narsa kutyapman. Takashi Inui jahon chempionatida Belgiya darvozasiga ikkita gol urgandi.

- O'zbekiston terma jamoasidan kimni ajratib ko'rsatasiz?
- Odil Ahmedov zaxirada qolibdi. Lekin uning o'rnida o'ynaydigan Fozil Musaev ham kuchli futbolchi. Uni "Jubilo Ivata"dagi o'yinlari orqali bilaman. Menimcha, bugun Yaponiya ko'p hujum qiladi, O'zbekiston esa asosan himoyada o'ynaydi.

X.Xoliqov suhbatlashdi.