Ulug'bek Baqoev: "Raqib hattoki birinchi liga klubi bo'lsa ham hurmat qilinmasa, natija kelmaydi"

"Turon"ni g'alaba bilan tabriklayman. Ular buni ko'proq istashgani ko'rinib turdi. To'g'ri, bugun chiroyli o'yin ko'rmagandirmiz, lekin yigitlar harakat qilishdi, intilishdi. Biz g'alabaga munosib emasdik. Bu nima bilan bog'liqligini bilmadim. Hozir ortiqcha gapirmoqchi emasman. Raqibga keyingi o'yinlarda omad tilayman.

Jamoa sovrinli o'rinlar uchun kurashar, ekan bosim bo'lishi tabiiy. Har bir turda istalgan jamoa bilan o'yinlarda shunday holat yuz beradi. "Turon" o'z o'yinimizni ko'rsatishimizga yo'l qo'ymadi. Futbolchilarimning mehnatini qadrlayman va minnatdorchilik bildiraman. Raqiblarimizning qaysi o'rinda ketayotganidan qatiy nazar hurmat bilan qarashimiz kerak", – deydi Ulug'bek Baqoev

- Hisobda ortda borayotganda hujumchi o'rniga tayanch yarim himoyachini tushirdingiz. Hujumchining o'rniga shu poziciya vakilini maydonga chiqarib o'yinni kuchaytirish imkoni yo'qmidi?

- Bu bizning taktik sxema. Bugungi o'yinda ish bermagan bo'lsa, keyingi bahsda ish beradi. 

- Bugungi mag'lubiyatda asosiy faktor nima bo'ldi, deb o'ylaysiz?

- Menimcha raqibni keraklicha hurmat qilmadik va shunga yarasha tayyorlanmadik. Har bir jamoani u hatto birinchi liga klubi bo'lsa ham hurmat qilinmasa, natija kelmaydi.