Turkmaniston bilan o'yin oldindan rejalashtirilmagandi yoxud endi ortga yo'l yo'q

Aslida qo'shnilarimiz bilan o'ynashimiz haqida avvalroq biror malumot elon qilinmagandi. Qiziq, bu yil hisobidan milliy jamoamizning ikkinchi uchrashuvi yopiq tarzda o'tkazilmoqda. Oldinda BAAda bo'lib o'tadigan Avstraliyaga qarshi uchrashuv ham yopiq o'tadi. Esingizda bo'lsa, qishdagi o'quv-mashg'ulot yig'inidan o'rin olgan "Zenit" bilan bahs ham shunday tarzda tashkillashtirilgandi. Ularning barchasi raqiblarning istagiga ko'ra bo'lgani aytilmoqda. Kecha Turkmaniston bilan kechgan bahs ham katta ehtimol dastlabki rejada bo'lmagan. Biz bu borada iqtidorli va tezkor futbolchi Ibrohimhalil Yo'ldoshevning fikrlari bilan qiziqdik. 

- Turkmanistonga qarshi bahs bu yig'in rejasidan o'rin olganmidi? Umuman futbolchilarning xabari bor edimi?

- Turkmaniston bilan o'yin oldindan rejalashtirilmagandi. Bosh murabbiyimiz Vadim Abramov 2-3 kun oldin o'zaro ikki tarkibga bo'lingan holda o'ynashimizni aytgandi. Lekin bir kun qolganda Turkmaniston raqib bo'lishini takidladilar. O'ylaymanki, hal qiluvchi yig'in oldidan mazkur o'rtoqlik uchrashuvi foydali bo'ldi. 

- Terma jamoamiz qiynalib yutgandek taassurot uyg'otdi...

- To'g'ri, birinchi bo'limda ozgina qiynaldik. Balki o'rtoqlik o'yini bo'lgani uchun bo'shashish holati kuzatilgandir. Qolgan daqiqalarda o'yinni o'z qo'limizga oldik. Yakunda g'alaba qozondik. 

- Oldindagi o'yinlarda futbolchilardan jismoniy jihatdan katta kuch talab qilinadi. "Tibet" oromgohidagi yig'in tiklanish uchun qanchalik foyda bo'ldi?

- Tabiat qo'ynida 5 kunlik yig'in olib bordik. Ikki mahal o'tkazilgan mashg'ulotlarda jismoniy jihatdan tiklanish mashqlariga etibor qaratildi. CHunki ko'p futbolchilar turli holatda etib kelgandi. 

- Ko'pchilikning etibori Saudiya Arabistoni bilan bahsga qaratilgan. Undan avval esa Singapur va Yaman to'sig'idan o'tishimiz lozim. Bu o'yinlar borligini esdan chiqarish yaxshilikka olib kelmasligi mumkin...

- Bu gapni hamma aytmoqda. Saudiya Arabistonini yutsanglar bo'ldi, degan fikrlar yangrayapti. Bu noto'g'ri. Biz uchun har bir o'yin finalga teng. Ortga yo'limiz qolmagan. Uchta uchrashuvda ham g'alaba qozonishimiz shart. Xudo xohlasa ijobiy natija ko'rsatamiz. Barcha jamoaga qarshi jangovar ruhiyatda maydonga tushamiz. Singapur yoki Yaman ahamiyati yo'q. Faqat g'alaba, faqat yutuq maqsad bo'lib qoladi.