Tanishing, “Bunyodkor”ning yangi futbolchisi: Bahodir Nasimov

Malum vaqt jamoamiz mashg'ulotlarida qatnashib, murabbiylar shtabida iliq taassurot qoldirgan Bahodir Nasimov va klub o'rtasida bitim imzolandi.

Muxlislar yaxshi bilishadiki, Bahodir Samarqand futboli tarbiyalanuvchisi hisoblanadi. U katta futbolga aynan Samarqandning “Dinamo” jamoasi orqali qadam qo'ygan. Bu jamoadagi olti yillik faoliyatidan so'ng Nasimov 2009 yilning boshlarida “Bunyodkor”da paydo bo'ldi. Jamoamiz bilan MDH kubogida ishtirok etib, beshta gol bilan musobaqaning eng yaxshi to'purarlaridan biri bo'ldi. SHundan so'ng unga Qozonning “Rubin” klubi bilan uch yillik shartnoma tuzdi.

Nasimov 2010 yilning yozida Bokuning “Neftchi” jamoasiga o'tdi. U bokuliklar safida uch karra Ozorbayjon chempionligini, ikki bor mamlakat kubogini qo'lga kiritdi. 2011/12 mavsumda esa 16ta goli bilan Ozorbayjon chempionatining eng yaxshi to'purari bo'ldi.

Hujumchi 2014/15 mavsumning birinchi qismini Eronning “Padideh” klubida o'tkazdi.

U O'zbekiston milliy terma jamoasi safida 20ta uchrashuvda maydonga tushib, raqiblari darvozasiga 5ta gol urgan.
Bahodir Nasimovning “Bunyodkor”dagi faoliyati muvaffaqiyatli chiqishiga tilakdoshmiz.

BIZNING MA'LUMOT
To'liq ismi: Nasimov Bahodir Olimjonovich
Tug'ilgan sanasi: 02.05.1987
Tug'ilgan joyi: Samarqand shahri
Ampluasi: Hujumchi
Bo'yi: 184 sm
Vazni: 80 kg