Suhrob Berdiev: “Bazida gol urishimga omad etishmadi”

Aytish kerakki, Berdiev bellashuvning 40-daqiqasida chiroyli tarzda “Xorazm” darvozasini ishg'ol qildi. 

- Uchrashuvdan keyingi fikrlaringiz qanday?

- “Xorazm” bilan o'yin qiyin kechdi. Biz bunday bo'lishini oldindan bilardik. CHunki raqib jamoa bosh murabbiyi Ruslan aka Ahmedovni oldindan tanirdim. “So'g'diyona”da ishlagan vaqtimizda jamoani yaxshi va tartibli jamoaga aylantirgandi. Biz ham o'yinga yaxshi tayyorgarlik ko'rdik va shu kuni omad biz tomonda bo'ldi. 

- Mazkur bahsda ilk golingizni kiritdingiz. Avvalgi o'yinlarda gol urish uchun sizga nimadir to'siq bo'ldimi?

- To'g'risi, ko'p imkoniyatlar bo'ldi. Lekin o'zim ulardan foydalana olmadim. Omad etishmadi ayrim holatlarda. “Xorazm” bilan bahsda gol urib oldim. Xudo xohlasa, bundan buyog'iga yanada ko'proq gollar urgan holda jamoaning g'alabalariga o'z hissamni qo'shmoqchiman. 

- Pro liganing bu yilgi mavsumi sizda qanday taassurot qoldirmoqda?

- Darhaqiqat kuchli. Qiziqarli va murosasiz bahslar soni ortgan. Agar hamma jamoaning maydoni talab darajasida bo'lsa, chempionat bahslari yanada qizg'in va yuqori darajada o'tishiga shubham yo'q. 

- Aytingchi, jamoangiz o'z oldiga qanday maqsad qo'ygan?

- Asosiy vazifa – kuchli beshlikga kirish hisoblanadi. G'alablari o'yinlarimiz bilan jamoa muxlislarini xursand qilish hisoblanadi. Umid qilamanki, omadsiz o'yinlarimiz ortda qoldi va bundan buyog'iga g'alabali yurishni davom ettiramiz. 

- Superliga jamoalaridan takliflar bormi?

- To'g'risi, Superligadan hali aniq taklif eshitganim yo'q. Faqat shunga yaqin gap-so'zlar bo'lmoqda. Barchasini vaqt ko'rsatadi.