"Saudiya Arabistoni chempionati AQSH bilan solishtirsa, nisbatan kuchliroq, eng kamida kuchsiz emas" - Diyor Imomxo'jaev

O'z vaqtida Bekxem yoki Lempardning AQSH ligasiga o'tishi qarsaklar bilan kutib olingandi. Bugun esa Krishtianuning Saudiya Arabistoniga kelgani ortga tashlangan qadam sifatida baholanmoqda. 

Biz g'irt neytral odam sifatida ayta olamizki, Saudiya Arabistoni chempionati AQSH bilan solishtirsa, nisbatan kuchliroq, eng kamida kuchsiz emas. SHunchaki g'arb uchun o'z qarashlari va ananalari muhimroq. SHarqqa qarab yurish esa jamoatchilik tomonidan baribir u qadar iliq qarshi olinmaydi. Xavining Qatarga, Ronalduning Saudiya Arabistoniga kelishi va hokazo. G'arb hattoki Qatar o'tkazishi kerak bo'lgan mundial bilan ham kamida 6 yil kurashdi. 

Afsuski, bizda ham mohiyat qolib, solishtirishga bo'lgan urinish kuchli. Biz "qanday qilib raqobatbardosh futbolchilarga ega bo'lish mumkin?" degan savoldan ko'ra, "Krishtianu kuchlimi yoki Messi?" qabilidagi savolni o'rtaga ko'proq qo'yamiz. Sizningcha, Krishtianu nimada yutkazdi:

▪️ daromad ko'rishdami?     

▪️ qadr-qimmatni saqlab qolishdami?

▪️ odamlar etiboridan qolishdami?

▪️ futboldan keyingi faoliyati uchun qadam qo'yishdami?

Saudiya Arabistoni juda katta pul to'layapti. Saudiyada hamma unga domlajon deb murojaat qiladi. Butun dunyo baribir Krishtianu haqida yozyapti, uni muhokama qilyapti. U futboldan keyin ham arablar bilan ishlaydi, qandaydir elchi bo'ladi, yuz bo'ladi va hokazo, ammo futboldagidan kam pul topmaydi. Yana nima kerak?

Krishtianu faqatgina vaqtga yutkazdi va Saudiya Arabistoniga borish qarori bilan buni rasman tan oldi. Siz vaqtdan ustun kelgan kimnidir bilasizmi?