Sardorlik masuliyati yoki maydondagi murabbiylar

Ko'pincha ularni bosh murabbiyning maydondagi yordamchisi deb ham atashadi. Bugungi maqolamiz orqali aynan oliy liga klublarining sardorlari haqida to'xtalib o'tishni lozim topdik.

XAYRULLA KARIMOV - “BUNYODKOR”

Superkubok sohibi “Bunyodkor” tarkibidagi eng yoshi katta futbolchi aynan Xayrulla Karimov. Lekin bu futbolchini yoshini inobatga olib unga sardorlik vazifasi yuklatilgan deb bo'lmaydi. Sababi 36 yoshli himoyachi bu vazifani ilgari “Navbahor” va “Mashal” klublarida ham bajargan. Endilikda esa u “Bunyodkor”da ham maydondagi murabbiy sifatida o'ynamoqda. Xayrulla Karimovda sardorlarga xos bo'lgan barcha jihatlar mujassam.

VIKTOR KARPENKO – “LOKOMOTIV”

Klubga Vadim Abramov kelishidan oldin “temiryo'lchilar”ni maydonga Dilshod Jabborov sardor sifatida boshlab tushayotgandi. Markaziy yarim himoyachi “Lokomotiv”ning birinchi ligaga tushib ketgan mavsumida ham klubda kolib quyi ligada o'ynagani va o'yin borasida ham barqaror harakat qilgani uchun ham sardorlik aynan Jabborovga berilgan degan fikrga bordik. Dilshodda etakchilik va sardorlarga xos bo'lgan xususiyat bor deyish mumkin. Lekin oxirgi o'yinlarda “Loko”ning sardori Viktor Karpenko ekanligini guvohi bo'lmoqdamiz. SHubhasiz Karpenko tajribali futbolchiva maydonda u o'z ishini qoyillatib bajarishga intiladi. Lekin unda sardorlarga xos bo'lgan hislat unchalik ham ko'zga tashlanmaydi. 

ARTUR GEVORKYAN – “NASAF”

Artur Gevorkyan ham sardorlik vazifasini “Nasaf”ga kelib bajarayotgani yo'q. turkmanistonlik futbolchi ilgari “SHo'rtan”da ham sardor sifatida o'ynagan. Gevorkyanning jamoadagi o'rni katta. Agarda u maydonga tushmasa “Nasaf” o'yinida ham qandaydir miqdorda pasayish bo'lishi mumkin. SHuni inobatga olib aytish mumkinki, Gevorkyan sardorlik vazifasini bajarishga munosib o'yinchi. Eslatib o'tamiz ungacha bu masuliyatli vazifani Botir Qoraev bajarayotgandi.

KAXI MAXARADZE – “PAXTAKOR”

“SHerlar”da ham huddi “Nasaf”dagi kabi legioner futbolchi sardor etib tayinlangan. Gurziyalik Maxaradze “Paxtakor”da katta hajmdagi ishni bajarmoqda. Eng tajribali futbolchilardan biri. Markaziy yarim himoyada raqib hujumlarini yo'qqa chiqarish va jamoadoshlarining oldinga o'tishlarini taminlab borishni qoyillatmoqda. “Paxtakor”da bu vazifani bolqonlik boshqa bir legioner Boyan Miladinovich ham bajara olishi mumkin. Bunga biz oldingi mavsumlarda ham guvoh bo'lganmiz.

SHOMURODOV, MULLAJONOV – “OLMALIQ”

O'tgan yili bu vazifasini ko'proq legioner himoyachi Darko Stanoevich bajargandi. Joriy mavsumning birinchi turida “Olmaliq” futbolchilarini maydonga sardor sifatida darvozabon Maqsatmurod SHomurodov boshlab tushgandi. 2-turda esa bu vazifani mahoratli himoyachi SHavkat Mullajonov bajardi. Umuman olganda bu jamoa tarkibida etakchi o'yinchilar ko'p. SHu bois keyingi turlarda jamoa sardori yana o'zgarsa sira ajablanmaymiz.  

SUHROB NE'MATOV – “BUXORO”

Bir necha yillar “Nasaf”da o'ynab yana qadrdon klubi bo'lmish “Buxoro”ga qaytgan Suhrob Nematov bu  yil jamoada sardorlik vazifasini bajarmoqda. Mahalliy futbolchi bunga munosib deyish mumkin. Bosh murabbiy Nematovni boshqa o'yinchiga almashtirganda masuliyatli vazifani SHerzod SHaripov bajargani haqida malumotlar bor. Vice sardorlar deb esa Georgi Kvesieshvili, Nodir Jo'raev hamda Bahriddin Vahobovni ko'rsatish mumkin.

HIKMAT HOSHIMOV – “METALLURG”

Sardorlar haqida gap ketganida Hikmat Hoshimovni alohida ko'rsatib o'tish kerak. Sababi bu futbolchida sardorlarga xos bo'lgan xususiyatlarning barchasi mujassam. So'zsiz Rustam Mirsodiqovning maydondagi ishongan yordamchilaridan biri desak ham mubolag'a bo'lmaydi. Hoshimov bu vazifani “Metallurg”da 5-6 yildan beri bajarib kelayotgani ham tahsinga loyiq. Undan tashqari vice sardor sifatida Sunnatilla Mamadaliev, SHuhrat Yuldashev va Mamur Ikromovni ko'rsatish mumkin.   

ANDREY MELNICHUK – “DINAMO”

Samarqandliklar sardorlik vazifasini legioner darvozabon zimmasiga yuklagan. Aytish kerakki, Melnichuk bunga munosib. CHunki tajribali posbon o'yin davomida jamoasini muqarrar gollardan saqlab qolish bilan birga orqada turib, sheriklarini xatolarini aytib turishi bilan ham etakchilikni o'z qo'liga olgan. Bizningcha “Dinamo”da vice sardor Asror Aliqulov bilan Sirojiddin Sayfiev bo'lsa kerak.

DILYORBEK ERMATOV – “NEFTCHI”

“Neftchi”da bu vazifani oxirgi yillarda asosan Mansur Saidov bajarib kelayotgandi. Tajribali futbolchi jamoa bilan xayrlashgach, sardorlik yana mahalliy futbolchi gardagina yuklatilganini guvohi bo'lmoqdamiz. Masuliyatli vazifani bajarish uchun Dilyorbek Ermatov bizningcha ham eng maqul tanlov bo'lgan. Undan tashqari bu vazifani Aleksandru Onika va Aleksandr Kleckov ham bajara oladi.

ILHOM BOYDADAEV – “NAVBAHOR”

Namanganliklar ham bu yil sardorlik vazifasini bajarishni mahalliy futbolchi Ilhom Boydadaev zimmasiga yuklagan. “Navbahor” tarkibida bir necha yillardan buyon barqaror o'yin ko'rsatib kelayotgan chap qanot yarim himoyachisida etakchilik xususiyati unchalik ham ko'zga tashlanmaydi. Balki Ilhomning og'ir-bosiqligi uchun chetdan bizga shunday tuyular. Vice sardor sifatida Mansur Saidovni ko'rsatish mumkin.

ALEKSANDR MELENCHUK – “SO'G'DIYONA”

Bu jamoa tarkibida eng tajribali futbolchi bu – Melenchuk hisoblanadi. CHindan ham legioner posbon bosh murabbiyning maydondagi yordamchisidir. Buni Davron Fayziev ham bir necha bor takidlab o'tgan. “So'g'diyona”da qolgan yosh golkiperlarni ham shug'ullantirib kelayotgan Melenchuk ko'pincha jamoasini muqarrar gollardan qutqarib qoladi. Undan keyingi o'rinlarda esa Rasul Hayitov, Ilyos Qurbonov kabi o'yinchilarni vice sardor sifatida aytish mumkin.

AKMAL XOLIQOV – “QIZILQUM”

Bu yil asosan mahalliy futbolchilardan iborat tarkib tuzishga harakat qilgan “Qizilqum” jamoasida bu yil himoyachi Akmal Xoliqov sardor sifatida o'ynamoqda. Navoiylik futbolchida etakchilik xususiyati qandaydir miqdorda bo'lsa ham bor. Har xolda u markaziy himoyachi sanaladi va orqada sheriklarini boshqarib turish imkoniga ega. Undan tashqari “oltin izlovchilar”ni Erkin Jabborov va Vladimir SHishelov ham sardor sifatida maydonga boshlab tushishi ham mumkin. Bu borada ular eng yaqin nomzoddir.

SALAMAT QUTIBOEV, SHERZOD FAYZIEV – “MASH'AL”

“Mashal”da bungacha sardorlik vazifasini Dilyaver Vaniev bajarib kelayotgandi. Lekin bu yil futbolchilik faoliyatidagi so'nggi mavsumini o'tkazayotgan tajribali himoyachini murabbiylar shtabi dastlabki ikki turda asosiy tarkibga kiritmadi. SHu bois masuliyatli vazifani Salamat Qutiboev va SHerzod Fayziev bajarganini ko'rdik. Ulardan tashqari bizningcha bu vazifani Mo'ydin Mamazulumov va Botir Nosirov ham bajara oladi.

RASUL RAHMONOV – “ANDIJON”

“Andijon”da azaldan sardorlik ko'pincha mahalliy futbolchi zimmasiga yuklatiladi. Ilgari ko'p yillar mobaynida bu vazifani Baxtiyor Hamidullaev bajargan. Bu yil ham klub azolari ushbu ananani davom ettirgan xolda, Rasul Rahmonovni sardor etib tayinlashgan. Bu yil jamoada beshinchi (!!!) mavsumini o'tkazayotgan Rahmonovni “Andijon”ning asosiy figuralaridan biri deyish mumkin. Ilgari “O'zDongJu” oliy ligada ishtirok etgan mavsumda ham Rasul Rahmonov bu vazifani ko'pincha o'zi bajargandi. SHu bois sardorlik Rahmonov uchun ham bu yil birinchisi emas. Vice sardorlar haqida gap borganida esa Ibrohim Otaxonov, Asror Rahmonov va shuhrat Mirxoldirshaevni aytish mumkin.

Islombek RUSTAMBEKOV.