Ravshan Ermatov rekord ostonasida

Germaniya - AQSH uchrashuvi Ermatovning JCHlardagi faoliyati davomida hakamlik qilgan SAKKIZINCHI o'yini bo'ladi. Bu bilan u Armando Archundiya, Xorxe Larrionda va Joel Kinyu kabi rekordchilar qatoridan joy oladi. Bu hakamlar JCH davomida 8tadan o'yinga tayinlangan.

Ayni paytda JCHda ishlayotgan hakamlardan Ermatovdan tashqari yana uch nafar hakam o'yinlari sonini oshirishi mumkin. Ular orasida Nishimura bitta o'yinda ishladi, keyingi bahslarga tayinlanadimi yoki yo'q hech kim aniq javob bera olmaydi. Braziliya - Xorvatiya o'yiniga 12 kun bo'libdiki, yaponiyalik hakam hali boshqa o'yin olganicha yo'q. Xovard Uebb hisobida ham bitta o'yin. Hozircha Marko Rodrigesning ishlari chakki emas. Ikkita o'yinni boshqarishga ulgurdi. Ammo kecha Suaresni chetlatmagani ko'pchilikka yoqmayapti.

Kamdan kam hollarda FIFA hakamlarga bir turda ikki marta o'yin beradi. Agar Ermatov mazkur bahsni yaxshi o'tkazsa va pley-off bosqichida hech bo'lmasa bitta o'yinga ega bo'lsa, JCH tarixlarida eng ko'p o'yinni boshqargan hakam bo'ladi. Qolaversa, Ermatov oldida rekord natijani yaqin yillar ichida hech kim yangilay olmaydigan holatga olib kelish imkoniyati bor. Ayni paytda 37 yoshli hakamimiz, Rossiyada bo'lib o'tadigan mundialga ham chaqiruv olishi mumkin, agar o'zining saviyasini bir tekisda ushlab tura olsa.

JCH-2014da ishlayotganlar orasida avvalgi musobaqada faoliyat olib borgan hakamlar:

Ravshan Ermatov, JCH-2010 - 5ta o'yin
Xovard Uebb, JCH-2010 - 4ta o'yin
Yuicha Nishimura, JCH-2010 - 4ta o'yin
Marko Rodriges, JCH-2006, 2010 - 2tadan, jami 4ta o'yin.

Nodirxo'ja Yuldashev.