"Paxtakor" vakillari kiberfutbolda

O'FF va PFL ko'magida "Virtual Football" kompaniyasi kiberfutbol bo'yicha ilk O'zbekiston chempionatini PCFL (Professional Cyber Football League) ligasining ilk mavsumini o'tkazishi haqida elon qilgandi.

Birinchi marta o'tkaziladigan mamlakat chempionatida klubimiz sharafini ikki kiberfutbolchi himoya qiladigan bo'ldi. Ular - Ravshan Tursunov va Isroil Rixsiev. Har ikki kiberfutbolchi bir qator musobaqalarda ishtirok etgan. Noyabr oyida chempionat bahslari start oladi.

Viloyat va shahar saralash o'yinlarida g'olib bo'lganlar Respublika Grand finaliga yo'l oladi. Grand finalda kuchli 16 talikka kirgan ishtirokchilar avtomatik ravishda Oliy ligada qatnashish huquqini qo'lga kiritishadi. Kuchli 32 talikka kirgan qolgan 16 ishtirokchi esa birinchi liga qatnashchisiga aylanadi.

Ikkala liga o'yinlari professional futbol kabi 7-8 oy davom etishi va OAVda yoritib borilishi rejalashtirilgan.

Eslatib o'tamiz, kiberfutbol bahslari FIFA 17 o'yini bo'yicha PS4 (PlayStation 4) konsolida o'tkaziladi.