"Paxtakor-79" halokatini o'z ko'zi bilan ko'rgan muxlis hikoyasi

- Men Sirdaryoning Boyovut tumanidanman. Yoshim 59da. Paxtakor jamoasining kamida 40 yillik muxlisiman. Sevimli jamoam Paxtakor-79 aviahalokatiga 36 yil to'lyapti. Oradan shuncha vaqt o'tgan bo'lsada, haligacha o'sha mashum voqeani unutolmayapman. Hozir ham hammasi xuddi kechagidek ko'z oldimdan o'tyapti. Sizga qo'ng'iroq qilayotganimning sababi ham aynan shu. Bilasizmi, o'sha payt yani aviahalokat ro'y berganida, aynan Dneprodzerjinsk shahrida harbiy xizmatni o'tayotgandim.

CHamasi kunduzgi soat 15da harbiy bo'linma komandiri biz - askarlarga zudlik bilan bir joyga borishimiz kerakligini aytdi. Bir necha askarni bortiga ortgan yuk mashinasi quyuq o'rmon ichiga kirib ketdi. Malum vaqt o'tganidan so'ng yalanglik joyga chiqdik. Ne ko'z bilan ko'raylikki, samolyot qoldiqlari. O'sha payt bu sevimli jamoam - Paxtakor futbolchilari halokatga uchragan samolyot ekanligini qaerdan bilay... Bizga portlash natijasida dahshatli holatga tushgan insonlarning tana azolarini bir joyga yig'ishni buyurishdi. Tasavvur qilyapsizmi, o'sha joydagi holat haqiqatan qanday dahshatli edi? Qo'l, oyoq, tananing boshqa azolari erda sochilib yotardi. Aksariyati kuyib ketgan... Paxtakor yozuvli sumkani ko'rgach, jonim halqumimga keldi, go'yo. Ko'p o'tmay, sevimli jamoam joy olgan samolyot portlaganini tushunib etdim. Dahshat va qo'rquvdan bir necha daqiqa joyimda qotib qoldim. Bizga u erda nima ko'rganimiz, eshitganimiz haqida lom-mim demaslikni qattiq tayinlashdi.

Kechga yaqin aviahalokat natijasida olamdan o'tganlar jasadini maxsus yashiklarga solib, shaharga olib ketishdi. O'sha kundan keyin bir necha oy o'zimga kelolmay yurdim. Axir Paxtakor-79 halokatga uchragan joyda barchasiga guvoh bo'lgandim. Voqeani eshitib, qancha odam o'zini yo'qotgan. Men esa mashum holatni o'z ko'zim bilan ko'rgandim. Futbolchilar oxirati obod bo'lsin. Sizga dardimni aytib, biroz engil tortdim... Suhbatdoshim ortiq gapirolmadi. Sattorqul akaning ko'zi namlangani titroq ovozidan shundoq bilinib turardi...

Ana shunaqa xotiralar. Ochig'i, bunday voqeani shu paytgacha hech kimdan eshitmagandim. Sattorqul akaning so'zlarini tinglayapmanu, bundan 36 yil avval ro'y bergan voqealar (garchi ko'rmagan bo'lsamda) ko'z oldimda gavdalana boshladi. Haqiqatan ham,  daxshat..

Kamoliddin Alimov