O'zbekiston U-19 terma jamoasi azosi Ibrohimhalil Yo'ldoshev: “Kuchli jamoalar bilan o'yinlarda o'zimiz uchun tajriba orttirdik”

Mazkur musobaqada muvaffaqiyatli ishtirok etishni maqsad qilayotgan yoshlar terma jamoamiz yaqinda Turkiyada o'quv-mashg'ulot yig'inini o'tkazib qaytdi. Temur Kapadze shogirdlari nomdor va Evropa jamoalariga qarshi o'rtoqlik uchrashuvlarida maydonga chiqishdi. Rasmiy bo'lmagan o'yinlarda natijaga jiddiy ahamiyat berilmaydi. Muhimi tajriba va o'yinni shakllantirish. Biz umumiy taasurotlar haqida futbolchi Ibrohimhalil Yo'ldoshevga murojaat qildik.

- Ibrohim, avvalo xorijda o'tkazilgan mashg'ulotlar haqida ikki og'iz fikr bildirsangiz...
- Birinchi galda yig'in va o'rtoqlik uchrashuvlarini tashkil qilib bergan O'zbekiston futbol associaciyasiga rahmat aytaman. Yig'in ko'ngildagidek o'tdi. Ayrim qiyinchiliklar ham bo'ldi. Jismoniy, taktik va ruhiy tomonlama ishladik. Nazariy mashg'ulotlarda qatnashdik. Darajasi biznikidan yuqori bo'lgan kuchli terma jamoalar bilan o'rtoqlik uchrashuvlarida maydonga tushdik. Kerakli va foydali narsalarni oldik. Tajriba orttirdik. Raqiblarimiz kuchli bo'lishiga qaramasdan tengma-teng o'ynashga harakat qildik.

- Mazkur terma jamoa uzoq muddat Otabek G'ulomxo'jaev qo'l ostida shug'ullandi. Endi esa Temur Kapadze murabbiylik qilmoqda. Yangi murabbiyning falsafasiga, uslubiga moslashish, ko'nikish qiyin bo'lmayaptimi?
- To'g'ri. Ko'p vaqt Otabek aka bilan birga ishladik. Bir qancha yig'inlarda, musobaqalarda ular bizga ustozlik qildilar. O'ziga yarasha maslahatlar berdilar, bilmaganlarimni o'rgandim. Temur akani qo'liga o'tganimizga ko'p bo'lmagan bo'lsada, tezda moslashib ketdik. Kerakli tavsiyalarni bermoqdalar. Jamoani birdamlikka chorlamoqdalar, ahil oila bo'lishimizni takidlayaptilar.

- Har bir murabbiyning talablari turlicha bo'ladi. Bir-biridan farq qiladi. Temur Kapadze futbolchilardan ko'proq nimani istayapti, talablari qanday?
- Ikki murabbiyni solishtirish qiyin masala. Temur akani uslublari taktika va kuchli presingga asoslangan, raqibga bosimni oshirish hisobiga to'pni olib qo'yib hujumni rivojlantirish. Otabek akaniki esa himoyadan tezroq qarshi hujumga o'tish edi. Umumiy qilib aytganda maqsadlarimiz ulkan. O'zimizda bo'ladigan Osiyo chempionatiga kuchli tayyorgarlik ko'rib, xalqimizni ijobiy natijalar bilan xursand qilishni xohlaymiz.

Abdulaziz Iskandarov suhbatlashdi