Osiyo Kubogi prevyusi. 1/4 final. Xitoy - Eron
24 jan 2019 00:18
Yangiliklar
Musobaqa g'olibligiga asosiy davogarlardan biri Eron bugun kechqurun Xitoy termasi bilan kuch sinashadi. Ab Dabidagi "Muhammad bin Zayed" stadionida kechadigan bahs Toshkent vaqti bilan 21:00da start oladi.
Xitoy
Hozircha musobaqada 4ta o'yin o'tkazgan Xitoy terma jamoasi shundan uchtasida g'alaba qozondi. Marchello Lippi shogirdlari Qirg'iziston, Filippin va 1/8 finalda Tailanddan ustun kelishdi. Ular faqat guruh o'yinlarida Janubiy Koreyaga 0:2 hisobida imkoniyatni boy berishdi. Bugun xitoyliklarni nihoyatda qiyin bellashuv kutib turibdi, chunki Eron bilan tengma-teng bahslashish oson bo'lmaydi.
Eron
Eron hisobida ham to'rtta o'yindan so'ng uchta g'alaba bor, lekin bu jamoa mag'lub bo'lmagan. Forslar guruh bosqichida Yaman va Vetnamni mag'lub etib, Iroq bilan durang qayd etishdi. 1/8 finalda esa Ummon uyga jo'natildi. Qizig'i shundaki, to'rtta uchrashuvda Eron hali birorta gol o'tkazmadi. To'plar nisbati 9-0. Bu jihatdan Eron musobaqadagi yagona jamoa bo'lib turibdi.
O'yindan oldingi fikrlar
Marchello Lippi (Xitoy termasi bosh murabbiyi): "SHubhasiz, Eron Osiyoning eng kuchli jamoalaridan biri. Ular jahon chempionatida juda yaxshi o'ynashdi. Raqibda kuchsiz tomonlarni ko'rmayapman. Bu jamoani yutish uchun taktik juda puxta o'ynash kerak. Xato qildingizmi tamom, Eron ayab o'tirmaydi".
Karlush Keyrush (Eron termasi bosh murabbiyi): "Futbolda o'yinlar bir-biriga o'xshamaydi. Hammasiga jiddiy tayyorgarlik ko'rish kerak. Xitoyga qarshi bahs biz uchun muhim ahamiyat kasb etadi. Bu jamoaga qarshi oldin ham o'ynaganmiz va raqibning kuchli-kuchsiz tomonlarini yaxshi bilamiz. Marchello Lippi hurmatga sazovor murabbiy, u yaxshi jamoani shakllantira oldi. Bu o'yinda biz favorit emasmiz".
O’xshash yangiliklar
![AMP Logo](https://championat.asia/image/logo-amp.png)
Fikrlar