Osiyo Kubogi-2015 saralash bosqichi. “D” guruhiga nazar

17:00. Yaman – Qatar
19:45. Bahrayn – Malayziya

“D” guruhida Bahrayn 7 ochko bilan birinchi, Qatar 6 ochko bilan ikkinchi o'rinda boryapti. Uchinchi o'rindagi Malayziya hisobida 4 ochko va oxirgi o'rindagi Yaman hisobida 0 ochko mavjud.

Entoni Xadson (Bahrayn termasi bosh murabbiyi): “Malayziyaga qarshi besh nafar asosiy futbolchimiz jarohat tufayli maydonga tusha olmaydi. SHunga qaramay, o'yinga tayyormiz. G'alaba qozonsak, Osiyo Kubogiga yo'llanma olamiz, buni shogirdlarim juda yaxshi his qilib turishibdi. O'ylaymanki, maydonga tushadigan hamma o'yinchilarimiz o'zlarining eng yaxshi xislatlarini namoyish eta olishadi. Malayziyadagi bahsda 1:1 hisobini qayd etgandik, endi uyda g'alaba qozonmasak bo'lmaydi.

K.Rajagobal (Malayziya termasi bosh murabbiyi): “Bu erga faqat g'alabani ko'zlab keldik. Bunga xoh ishoning, xoh ishonmang. To'g'ri, biz raqibni hurmat qilamiz, lekin jamg'arilgan 4 ochko bilan to'xtab qolmoqchi emasmiz. Biz o'zimizga yanada ko'proq etibor qaratilishini istaymiz. Toki guruhdan chiqish imkoniyati bor ekan, oxirigacha kurashamiz”.

Fahad Tani (Qatar termasi bosh murabbiyi): “O'tgan turda Yamanni 6:0 hisobida mag'lub etdik. Ammo bu bilan ularni kamsitish kerak emas. Navbatdagi o'yinga avvalgi natijani unutgan holda qarashimiz kerak. SHundagina yana bir marta g'alaba qozona olamiz”.

Sami Naash (Yaman termasi bosh murabbiyi): “Bu o'yin saralashda dastlabki ochkoni qo'lga kiritish uchun juda yaxshi imkoniyat. Oldimizda uchta bahs qoldi va qaysidir o'yinda ochko qo'lga kiritsak, bundan juda mamnun bo'lardik. Yamanda futbol rivojlanishi uchun ham Qatarni mag'lub etishga urinib ko'ramiz”.

Xayrulla Xoliqov tayyorladi.