Osiyo Kubogi-2015 saralash bosqichi. “A” guruhiga nazar

15:30. Suriya – Singapur

Suriya termasini bir hafta muqaddam yangi murabbiy qabul qilib oldi - Hussam Al Sayed. Bugun uning qo'l ostidagi jamoa Singapurga qarshi to'p suradi. Suriyada davom etayotgan siyosiy notinch vaziyat tufayli o'yin Eron poytaxti Tehronda o'tkaziladi. Bugun shuningdek, Ummon – Iordaniya bahsi ham o'tkazilishi lozim edi, biroq Iordaniya JCH-2014 pley-off bosqichida ishtirok etayotgani bois bu o'yin 31 yanvarga qoldirilgan.

Guruhda Suriya 1 ochko bilan oxirgi o'rinda boryapti. Singapur hisobida esa 3 ochko bor. O'yindan oldingi matbuot anjumanida suriyaliklar ustozi quyidagi fikrlarni bildirib o'tdi:

“Bu bahs biz uchun nihoyatda muhim. Agar g'alaba qozonsak, 2015 yil Avstraliyaga borish imkoniyatiga ega bo'lamiz. Bilishimcha, Singapur - yaxshi jamoa, lekin biz ham qarab turmaymiz. Raqibni jiddiy o'rganib chiqdik va ular haqida hamma narsani bilamiz”.

Ayni paytda Singapur terma jamoasini germaniyalik taniqli murabbiy Bernd SHtange boshqarmoqda. Uning so'zlariga ko'ra, futbolchilar bo'lajak bahsga tayyor:

“O'z maydonimizda Suriyani 2:1 hisobida mag'lub etgandik. SHunday ekan, safarda ham ijobiy natijaga umid qilyapman. Jamoamning o'rtacha yoshi 23dan iborat. Ko'rinib turibdiki, bizda yosh terma jamoa bor. Biz Suriyani kamsitmoqchi emasmiz, lekin yutish uchun maydonga tushamiz”.

Xayrulla Xoliqov tayyorladi.