Olis masofadan darvozani ishg'ol etib, tur goliga mualliflik qilgan yarim himoyachi, darvozani "quruq" saqlab, jamoasi g'alabaga erishishiga ko'maklashgan posbon - Superligada 25-tur laureatlari

"Championat.asia" o'tkazilgan bahslar asosida tur laureatlarini aniqladi.

"Bunyodkor" azosi Sarvar Karimov "Championat.asia" sayti talqiniga ko'ra 25-turning eng yaxshi darvozaboni deb topildi. 

"Qaldirg'ochlar" darvozaboni ortda qolgan turda o'zini har taraflama ko'rsatib, darvozasi daxlsizligini saqlab qoldi, uning jamoasi "Metallurg"ni 1:0 hisobida engishga erishdi.

"Olimpik" iqtidorli yarim himoyachisi SHerzod Esanov "Championat.asia" talqinida 25-turning eng yaxshi futbolchisi deya elon qilindi.  

"Olimpik" vakili "Navbahor"ga qarshi bellashuvda faol harakatlari bilan ajralib turdi va chiroyli gol urib, jamoasi g'alaba qozonishida katta hissa qo'shdi.

"Olimpik" xavbeki SHerzod Esanovning 86-daqiqada "Navbahor" darvozasiga kiritgan to'pi "Championat.asia" talqiniga ko'ra 25-turning eng chiroyli goli (VIDEO) deb tan olindi. 

CHap qanotda to'p tepgan yarim himoyachi namanganliklar bilan uchrashuvda tinim bilmadi va o'yin yakuniga oz qolganida olis masofadan yo'llagan zarbasi orqali hisobni oshirdi. 

"Olimpik" bosh murabbiyi Timur Kapadze "Championat.asia" talqiniga ko'ra 25-turning eng yaxshi murabbiyi sifatida etirof etildi.

"Olimpik" ushbu turda sovrinli o'rin uchun kurashayotgan "Navbahor"ni mehmon qilib, 2:1 hisobida zafar quchdi. Olimpiyachilar ustozi Kapadze tarkibda bir qancha muammolar borligiga qaramay, rotaciyaga qo'l urilgan tarkibni maydonga tushirdi va uning tanlovi o'zini oqlab, jamoa g'alaba qozonishga erishdi.