Oliy liga nazoratchisi: “Ermatov penalti belgilashi kerak edi”

Bu Ermatovning mundialdagi ikkinchi o'yini bo'ldi. Yaxshi bilasiz, Ermatov dastlab “E” guruhidan o'rin olgan SHveycariya - Ekvador bahsini boshqarib borgandi.

Kechagi o'yinning 63-daqiqasi o'tib borayotgan bir paytda g'alati voqea sodir bo'ldi. Meksikaliklar futbolchisi to'pni o'ng qanotdan jarima maydonchasi sari etkazib berdi. Andres Guardado tepgan to'p xorvatiyalik o'yinchilardan birining qo'liga tegib maydon tashqarisiga chiqib ketdi. SHunda meksikaliklar hujumchisi Xaver Ernandes Ravshan Ermatov yoniga yugurib kelib to'p qo'lga tekkanini va penalti belgilash lozimligini uqtira boshladi. Ermatov esa burchak to'pi tepish kerakligini ko'rsatdi. Xo'sh, aslida qoida buzilganmidi?

Oliy ligada nazoratchilik qilayotgan mutaxassislardan birining saytimizga malum qilishicha, o'sha vaziyatda hakam penalti berishi kerak edi. Faqat nazoratchi o'z ism-sharifini yozmaslikni bizdan so'radi. Nazoratchining fikrlari quyidagicha bo'ldi:

“Men Ravshan Ermatov bugun bo'lib o'tadigan Urugvay - Italiya uchrashuvini boshqarsa kerak deb taxmin qilgandim. Lekin FIFA uni Xorvatiya - Meksika bahsiga tayinladi. Bu o'yinda kim mag'lub bo'lsa, musobaqa bilan xayrlashishi turgan gap edi, shu bois o'yin juda shiddatli kechdi. Umuman olganda, Ravshan Ermatov uchrashuvni o'z saviyasida boshqardi. Lekin 63-daqiqada Xorvatiya darvozasi tomon penalti bermasdan xatoga yo'l qo'ydi. CHunki meksikalik futbolchi to'pni zarb bilan tepgandan keyin xorvatlar himoyachisi to'pni qo'li bilan o'ynab maydon tashqarisiga chiqarib yubordi. Bunday holatda qoida buzilgan deb topiladi va bosh hakam 11 metrlik jarima to'pini belgilashi talab etiladi. Ammo Ermatov burchak to'pini ko'rsatib, xatoga yo'l qo'ydi. Harqalay hakamlarimizning baxtiga meksikaliklar g'alaba qozonishdi. Mabodo Xorvatiya zafar quchganida bormi, keyinchalik o'sha vaziyat keng jamoatchilik tomonidan jiddiy muhokama qilinayotgan bo'lardi”.

X.Xoliqov.