Oleksandr Pishur: Hammasi o'zingiz o'ylagandek bo'lmas ekan

- Namangandagi faoliyatingiz juda qisqa bo'ldi...
- To'g'risi, hech bo'lmaganda mavsum oxirigacha to'p surish uchun O'zbekistonga qaytgandim. Navbahorni tark etgan bo'lsamda, u erda ajoyib xotiralarim qoldi. Tarkibimiz chakki emas edi. Ming afsuski, doim ham siz istagandek bo'lavermas ekan. Jamoamiz yangiligi uchun kerakli ochkolarni qo'lga kirita olmagan bo'lishimiz mumkin. O'sha tarkib bilan yuqori o'rinlar uchun kurashish mumkin edi. Ammo asta-sekin barchasi iziga tushayotganda...

- Navbahor tanaffusga 13-o'rin bilan chiqib ketdi.
- Yuqorida aytib o'tganimdek, Namanganda tarkib qaytadan tuzilgandi. Barchaga malumki, yangi jamoa bilan darrov natijaga erishib bo'lmaydi. Bir muncha vaqt talab etiladi. Balki talabchan muxlislarning bosimiga dosh berolmagandirmiz? Ikkinchi davrani jamoa yomon boshlagan bo'lsada, o'z maydonida ikki bor g'alaba qozonibdi. Albatta, Navbahorga keyingi uchrashuvlarda omad tilayman.

- Yana Tarazga qaytdingiz. Sizni yana iliq kutib olishdimi?
- To'g'risi, Navbahorga o'tayotganimda bu erdagilar menga qarshilik ham qilishgandi. SHunga qaramay, qozoqlar meni jamoada yaxshi kutib olishdi.

- Navbahorda 5 ta gol kiritgandingiz. Jambulda esa 3 ta o'yinda maydonga tushdingiz, gol esa yo'q.
- Asosan zaxiradan maydonga tushyapman. Murabbiylar ko'proq senegallik Malik Manega ishonch bildirmoqda. Bugun (21 avgust) Atirauga qarshi o'yinda gol kiritishga harakat qilaman.

- Namangandagi faoliyatingiz davomida esingizda qolgan qiziqarli voqea?
- Namanganda havo issiq bo'lardi. Klub bazasidagi xonamizda kondicioner yo'q edi. Ko'pincha sheriklarim bilan bozordan gilos va shunga o'xshash mevalar olib, tashqarida osmonga qarab tanovvul qilib oyoq cho'zardik (kuladi). Bunyodkorda esa o'yindan oldin jamoadoshlarimdan biri butsamni ichiga hazillashib suv quygan edi. Qizig'i, o'sha kungi uchrashuvda dublga erishgandim.

- Tarazdagi faoliyatingizga omadlar tilab qolamiz!
- Katta rahmat. Fursatdan foydalanib, barcha yurtdoshlaringizni O'zbekiston Mustaqilligini 25 yilligi bilan chin dildan tabriklayman. Namanganlik muxlislarga esa mening nomimdan alangali salom yo'llab qo'ying!


Obid RUSTAMOV suhbatlashdi