Obid Jo'raboev: "Ustunlikka erishsakda, g'alaba qozonish nasib etmadi"

Jo'raboev ham boshqa jamoadoshlari kabi Muborakdan ijobiy natija bilan qaytish umidida edi. Ammo, "Navbahor" 4-turda ham muxlislariga g'alaba tortiq eta olmadi. Futbolchi uchrashuv xususida quyidagi fikrlarni bildirib o'tdi:

- Bugungi uchrashuv haqida nima ham deya olardim. O'yin davomida ustunlikka erishdik. To'pni nazorat qilish va hujumlar tashkil etish borasida yomon harakat qilmadik. Ammo, natija ijobiy ko'rinish hosil qilmadi. Muxlislar va o'yinimizni chetdan kuzatayotganlarga o'yindan ko'ra natija muhimroq. Yani o'yin esdan chiqadi, natija esa tarixda qoladi. Birinchi bo'lim oxirlarida jarima zarbasidan keyin o'z darvozamizdan to'p olib chiqishga majbur bo'ldik. Darvozabonimizni ushbu to'pni qaytarishi qiyin edi. O'yin borasida olib qaraganda, "Mashal" futbolchilaridan ustun edik. Kamida durang qayd etishimiz yoki bo'lmasa g'alaba qozonsak bo'lardi.

Tanaffusdan keyin hisobni tenglashtirishni uddasidan ham chiqqandik. Biroq, goldan keyin harakatlarimizda qandaydir pasayish yuzaga kelib, yo'q joydan ikkinchi to'pni o'tkazib yubordik. To'rtta turdan beri g'alaba qozonishga erisha olmayapmiz. Buning sababini tushuna olmayapmiz. Nazarimda g'alaba bizga kulib boqishni istamayapti. Aslini olganda uchrashuvlar davomida gol urish borasida ko'plab imkoniyatlar bo'lmoqda. "Mashal" esa ikkita imkoniyatdan samarali tarzda foydalana oldi. Balki bizga omad etishmayotgandir.  Kamchiliklar ustida ishlab, muxlislarimizni xursand qilish uchun harakat qilamiz, - deydi Jo'raboev.

"Navbahor" matbuot xizmati