Moskva kundaligi, 9-kun: Denisov bilan intervyu va bizning “PRESSAMIZ” haqida

“CHerkizovo” stadioni men uchun yaqin bo'lib qoldi. Avvaliga bu erda “Spartak” – “Krilya Sovetov” uchrashuvini tomosha qildim, keyin “Lokomotiv” – “Anji” uchrashuviga bordim. Ikki kun o'tib kichik manejda Marg'ilon va Andijondan kelgan hamyurtlarimiz o'rtasida bo'lib o'tgan o'yinda qatnashdim.

Aslida Moskva safaridan bundan-da ko'pini kutgandim. O'zi men shunaqaman, o'z oldimga doim maksimal vazifalarni qo'yaman. Bazan bu yo'lda pand eyman, lekin har safar keyingi safar oldidan kamchiliklarimni bilib olaman. Bu ham katta narsa, aslida terma jamoa uchun o'tkaziladigan o'rtoqlik o'yinlari ham aynan shuning uchun kerak.



Men ham o'zimni har bir xatoimdan to'g'ri xulosa chiqarishga o'rganganman. Hayotimda tub burilish yasagan musobaqa, bu Qatarda bo'lib o'tgan Osiyo Kubogi bo'ladi. Bu erda professionallar orasida qanday ishlashni o'rgandim. Yapon va Xitoy  matbuoti nima uchun tezkor ishlashini yaqindan ko'rdim. Undan keyin ko'plab turnirlarda bo'ldim. Mana ko'p o'tmay Moskvaga tashrif buyurdim. Aytishim mumkinki, Moskva safari menga Qatar-2011dan keyingi eng katta maktab bo'ldi. CSKA – “Ural”, “Spartak” – “Krilya Sovetov” va “Lokomotiv” – “Anji” o'yinlari davomida to'plagan tajribamni bir so'z bilan izohlab bera olmayman. “NTV+” kanali orqali tanish bo'lgan jurnalistlar va “CHempionat.kom”, “Sport Ekspress” nashrlarini qanday ishlashi hamda berilgan vazifani qay darajada bajarishlarini ko'rish men uchun katta maktab bo'ldi.
Xuddi men kabi klublarimiz o'z oldiga eng maksimal natijani qo'ysalar, hech bo'lmasa beshdan birini bajaradilar. Keyingi yili ikkisi, shu tariqa 5 yil ichida takomillashib boraveradilar.

Hullas, “Lokomotiv” matbuot kotibi Denisning taklifiga ko'ra, klubning bosh binosiga tashrif buyurdik. U erda bizni kutib olgan hodim maxsus syomka uchun ajratilgan xonaga boshladi. Bir kirishdayoq payqadim, bu xonada syomkadan tashqari klub saytida chiqadigan turli video va fotolar qayta ishlanadi. Klubning tarixiy videolari ham shu erda saqlanadi. Montaj uchun zamonaviy texnikalar xarid qilingan. Bo'limda 4 nafar mutaxassis faoliyat olib boryapti. Ularning vazifasiga quyidagilar kirar ekan. Fotomuxbir bularning ichida yo'q. O'yin oldi promo-roliklar ham shu erda ishlab chiqiladi.



Bugunga kelib ko'plab stadionlarimizda zamonaviy tablolarni ko'ramiz. Lekin tabloning imkoniyatidan hech bir klub to'g'ri foydalana olmayapti. Joriy mavsumdan boshlabgina “Bunyodkor” o'yin oldi prevyuni video shaklida qo'yishni boshladi. Agar jamoa xodimlari hech bo'lmasa bitta o'yinga moskvaga kelib ketadigan bo'lsalar, ularning ishlaridagi sifat yanada oshishiga shubham yo'q. Baribir o'qib o'rgangandan, ko'rib o'rganganga etmaydi.

Klubning targ'iboti bilan 10dan ortiq xodim shug'ullanar ekan. Bizning matbuot xizmatimizda “Bunyodkor”da video operatorlarni qo'shib hisoblaganda 6 nafar, “Paxtakor”, “Lokomotiv” va “Nasaf”da uch nafar, qolgan klublarimizda esa bir nafar xodim faoliyat olib boradi. O'yin oldidan chiqariladigan dasturga (programka) katta etibor qaratiladi. Buning ustida bir guruh ishlaydi.

Men Denisovni kutib o'tirgan chog'im ikki nafar xodim 4 may kuni “Zenit”ga qarshi o'yin oldidan qanday rolik yasashni o'ylayotgan edilar. Bizdagi matbuot kotiblarimizning 70%da ikkinchi ishlari mavjud, chunki klubda ular olayotgan haq juda ham kam bo'lib, oilani boqish uchun ikkinchi ish topmasa bo'lmaydi. Balki bu talabalik paytida bilinmas, ammo qachonki oila boshi bo'lar ekansiz, vaziyat tubdan o'zgaradi. Bizning klub rahbarlarimiz futbolchilarga yaratadigan va ularga aytadigan gaplari shunaqangi shirin bo'ladiki, matbuot kotibiga kelganda, tittt.....



Bizga ajratilgan xonada istalgan buyumdan foydalanishimiz mumkinligini aytishdi. Haqiqiy professional darajadagi studiya. Kamera bilan borsangiz bo'ldi, qolgan hammasi muhayyo. Aslida bizda ham shunday bo'lishi kerak, xuddi shunday, bitta chirog'i ham kam bo'lishi kerak emas. Lekin bir gap aytaman kulmaysiz, quvvat etkazib beruvchi “pilot”dan boshqa hech nima bizning klublar matbuot xonasiga o'xshamaydi. Oliy liga jamoalari ichida faqatgina “Nasaf” klubining balansidagina fotoapparat bor. “Paxtakor” va “Bunyodkor”dagi suratlar esa shaxsiy fotoapparat hisobiga tushiriladi. “Mashal”da ham zamondan ortda qolgan bo'lsa-da foto texnikasi yo'q emas. Qolgan klublar matbuot kotiblari telefonlaridan foydalanadilar, aya-ya...

Bitta futbolchiga bir yil uchun yuz millionlab pul sarflaydigan bilimdon rahbarlarimiz, 10 yilga etadigan texnikaga shu pulni ajrata olmaydilar. CHunki kissaga undan foyda yo'q. Na O'FF, na PFL, na klublarimiz sayt va media futbolning yuzi ekanligini tushunmaydi. Aslida bizning eng katta kamchiligimiz shundan. Toki matbuot sohasi va uning moddiy texnika bazasiga etibor qaratilmas ekan, futbolimizda o'sish siz kutgan darajada bo'lmaydi. Pul esa yo'q emas, faqat uni to'g'ri ishlatadigan menejerlar yo'q.

Nodirxo'ja Yuldashev.