Moyesning MYUdan ketishi uchun 31 sabab (1-qism)

The Telegraph nashri Moyesni istefoga chiqarish uchun 31ta sabab topib berdi.

Umumiy sabablar

1.   Premer-liganing amaldagi chempioni va eng boy klublar ro'yxatida uchinchi o'rinda borayotgan “Manchester Yunayted”:

– Angliya chempionati turnir jadvalining ettinchi o'rinida boryapti. So'nggi 24 yil ichidagi eng past ko'rsatkich;
– Hech qachon Angliya Kubogini yutmagan “Suonsi” uni ushbu turnirdan chiqarib yubordi.
– Hech qachon Liga kubogida “Yunayted”ni engmagan “Sanderlend” manchesterliklarni ushbu musobaqadagi yurishiga nuqta qo'ydi.

Sodda qilib aytganda, bu – parokandalik.

Umidsizlantiruvchi statistika

2.   2013 yilning 28 mart kuniga kelib, u APL turnir jadvalida eng yaqin taqibchisidan 15 ochko ilgarilab ketgan holda 74 ochko bilan peshqadam bo'lib turgandi.
 


2014 yilning 28 mart kuniga kelib esa jamoa 54 ochko to'plab, 7-o'rinda bormoqda va etakchidan 18 ochko ortda qolmoqda.


 
3. 51 ochko – Prmeer-liga tarixidagi jamoaning eng yomon ko'rsatgichi. Mavsumning shu pallasigacha MYU hech qachon 60 ochkodan kam to'plamagandi.
4. MYU o'z uyida “Norvich” va “Xall”dan ham kamroq ochko to'plagan (21).
5. Premer-liga doirasida “qizil iblislar” turnir jadvalining so'nggi pog'onalarida borayotgan “Kardiff” va “Fulxem” bilan bir xil miqdorda gol urgan (18ta).

6. Moyes amaldagi chempion bilan, o'tgan yili “Everton” bilan ko'rsatgan natijalaridan ko'ra yomonroq ko'rsatkich namoyish qilyapti.

TAKTIKA

7. Mavsum avvalida Yunayted Fergyuson ketganidan qanchalik qiynalsa, “Everton” ham Moyesning ketishidan shunchalik jabr ko'rishi taxmin qilingandi. Aslida esa Liverpul jamoasi yangi darajaga ko'tarildi.
Roberto Martines boshchilik qilayotgan “Everton” o'z o'yin uslubini o'zgartirdi va 30 o'yindan keyin 57 ochko to'plab, turnir jadvalida “Manchester Yunayted”dan yuqoriroqda bormoqda. O'tgan mavsumlarning shu pallasida Moyes boshchiligidagi klub hozirgidan o'rtacha 12 ochko kamroq to'plardi (51, 40, 40, 45, 48).

Bu ikki murabbiyni taqqoslar ekan, jamoa yarim himoyachisi Ross Barkli ham taktika masalasiga etibor qaratdi. “Martines ham Devid Moyesga o'xshashroq tarzda ish olib boradi. Ularning har ikkisi ham mashg'ulotlarni o'z nazoratlari ostida bo'lishini yaxshi ko'rishadi. Lekin Martines Moyesdan ko'ra kuchliroq taktik. U kelgach, biz taktika borasida juda ko'p ish olib bora boshladik. Bu men uchun juda foydali, axir men hali yosh futbolchiman”, degan edi Barkli.

8. Moyes boshchiligidagi MYUning o'yin uslubidagi kamchiliklarni quyidagi kadrlar yaqqol ochib beradi. Umuman olganda, har turli kadrlar orqali Moyesning himoyasi qanday ekanini tushuntirib berish mumkin.

Quyidagi suratlar Pep Gvardiolaning “Bavariyasi va Moyesning MYUsi orasidagi farqni ko'rsatib turadi.
 


“Manchester Siti”ga qarshi o'yinda futbolchilar pas o'ynash uchun bir-biriga maksimal qulay masofada joylashgan holda “Bavariya” o'z hujumini boshlamoqda.


 
“Fulxem”ga qarshi o'yinda Rafael o'ziga eng yaqin futbolchi 15 metr uzoqlikda joylashgan  vaziyatda jamoa hujumini boshlayapti.

9. “Fulxem”ga qarshi o'yinda (2:2) “Manchester Yunayted” 81 marotaba qanotdan havolatib jarima maydoniga to'p uzatdi va undan 18tasigina “qizillar”ga borib tushdi. Bu esa butun futbol jamoatchiligi uchun kulgu mavzusiga aylandi.

Mavsum davomida hujumda variantlilik va keskinlik etishmayapti. Ko'pchilik buni Feryusondan meros bo'lib qolgan tarkibning u qadar mahoratli emasligi va yoshi o'tib qolgani bilan bog'layapti. Biroq “Liverpul” va “Manchester Siti”ga qarshi aynan taktik jihatdan rasvo o'tkazilgan o'yinlar bu fikrni inkor qilib turibdi.

O'tgan yilning yanvar oyida “Manchester Yunayted” o'z maydonida “Liverpul”ni 2:1 hisobida mag'lub qilgandi. O'yinning katta qismida ustunlik aynan “Yunayted” tomonida bo'lgan, to'pga egalik bo'yicha ham ko'rsatkich Fergi shogirdlarida ancha yaxshiroq edi. Raqib darvozasiga 15ta aniq zarba yo'llagan. 12 kun avval liverpulliklarga qarshi maydonga tushgan 14 futbolchining 10tasi o'sha o'yinda ham o'ynagandi. Bu safar “iblislar” butun o'yin davomida darvoza tomon bir dona anqi zarba yo'llagan. Bu so'nggi 5 yillikning eng yomon ko'rsatkichidir.

Moyes 18 oydan beri “Liverpul”da ish olib borib, “qizillar”ni kuchli, barqaror, hujumkor, oldingi chiziqda ko'p variantli jamoaga aylantira olgan Brenden Rojersga barcha jabhalarda bo'yicha mag'lub bo'ldi. Rojers o'z jamoasida qilgan ishlarning hech birini Moyes amalga oshirishni boshlagani ham yo'q.

Gari Neyvill “Siti”ga qarshi o'yindan so'ng shunday degandi: “MYU” qay tarafga qarab harakatlanayotgani haqida o'ylab ko'rsa yomon bo'lmasdi. Jamoa hujumida na tezlik va na aniqlik bor. Ayni vaqtda ular rostakamiga inqiroz ko'chasidadir”.

10. Ko'pchilik Moyesning jamoadagi eng kreativ futbolchilaridan biri – SHinji Kagavani tarkibga juda kam kiritayotganidan norozi. Kagavaning sobiq klubi “Borussiya” bosh murabbiyi Yurgen Klopp bu haqida to'xtalib o'tgandi.   

         Transfer bozori

11. “Manchester Yunayted” va Moyes futbol jamoatchiligi fikriga ko'ra yozgi transfer mavsumini bekorga va befoyda o'tkazib yuborishdi. Moyes Sesk Fabregas, Krishtianu Ronaldu, Leyton Beyns, Fabiu Koentrau va Ander Erreralarni ortidan quvib, hech birini qo'lga kirita olmadi va ohir oqibat Moyesning “Everton”dagi shogirdi Maruan Fellainini 27,5 million funt evaziga sotib oldi. Mavsum o'rtasida Xuan Mata sotib olindi va shu ikki futbolchi uchun 70 million sarflandi. Hozir esa Moyes nima uchun bu ikki futbolchiga shuncha harajat qilingani haqidagi savollarga javob ham bera olmayapti.   

12. Fellainining narxi, albatta, unga to'langanicha emas. U mavsum avvalidan beri 17ta o'yindagina maydonga tushdi. Birorta ham gol urmadi. Birorta ham golli pas bermadi.


 
13. Mata haqida xulosa chiqarishga hali erta. Biroq uning jamoaga tasiri hozircha minimal darajada. Uning jamoaga qo'shilishini ajoyib qaror deb hisoblagan ekspertlar o'ylanib qolishdi: Balki Joze Mourino Xuanni mana shunday katta pulga sotib, lotoreyadan katta yutuq yutib olgandek bo'lgandir. “Yunayted” tarkibida 9ta o'yinda maydonga tushgan Mata birorta ham gol urmadi va darvoza tomon bittagina aniq zarba yo'lladi. Moyes uning uchun 42,5 million funt to'ladi va bu futbolchidan qanday qilib maksimal foyda chiqarishni bilmayapti. Ko'pincha u o'zi sevgan hujumchi ortidagi joyiga qo'yilmayapti va u golli vaziyatlar yaratish bilan shug'ullanish o'rniga to'pni u yoqdan bu yoqqa uzatish bilan mashg'ul bo'lishiga to'g'ri  kelyapti.


 
14. Jamoa rahbarlari yozgi transfer mavsumida transferlar uchun 100 million funt ajratishga tayyor. Jamoani qayta qurishga bo'lgan ehtiyoj yaqqol sezilib turibdi. Biroq bu pullarni sarflashni Moyes to'g'ri amalga oshira olarmikan?

Keling, mayli,Fellaini va Mataning o'yinlardagi ishtirokini chetga surib turamiz. Toni Kroosdek futbolchilar ham Moyes btilan ishlashni xohlashiga ishonish qiyin ekani-yu, 51 yoshli mutaxassisning bunday katta byudjet bilan ishlash tajribasi yo'q ekanini ham etiborga olmay turamiz. Hatto “Everton”dagi haridlari ham uning transfer bozorida yaxshi ishlay olmasligi haqida guvohlik berib turibdi. U kuchli futbolchilarni sotib olganida, ular avvalgi klublaridagidek yaxshi o'ynab keta olishmagan. U sotib olgan eng qimmatbaho futbolchilar – Yakubu, Jonson, Bitti juda kam gol kiritgan.

Tahqirlanish

 “Yunayted” ushbu mavsumda, umuman olganda yutishi kerak bo'lgan, juda bo'lmaganda mag'lub bo'lishi kerak bo'lmagan, uzoq vaqtlardan buyon yutqazmagan jamoalariga o'yinni boy berish, mag'lubiyatsiz seriyalarni yakunlash bilan band.

15. “Vest Bromvich” “Old Trafford”da 1987 yildan buyon mag'lub bo'lmagandi va bu ananaga Moyesning MYUsi chek qo'ydi. “Vest Brom”ning hech bir futbolchisi ularning jamoasi so'nggi marta “Yunayted”ni yutganida tug'ilmagan ham edi.

16. 1992 yildan beri MYU maydonida g'alaba qozonmagan “Everton” 2013 yil dekabrida 1:0 hisobida g'alaba qozonib, o'zining sobiq bosh murabbiyini uyatga qo'ydi.

17. Yoan Kabayning “Old Trafford”dagi dekabr oyida urgan goli 41 yildan beri “Nyukasl”ga nasib etmay kelgan g'alabani tortiq etdi.
 
18. “Tottenxem”ga o'z maydonida mag'lub bo'lgan “Yunayted” 20 yillik mag'lubiyatsiz  ananaga chek qo'ydi.

19.  “Suonsi” yanvarda Angliya Kubogi doirasida o'z tarixida birinchi martda MYUni mag'lub etdi. Fergyuson o'zining 27 yillik faoliyati davomida Kubokning uchinchi bosqichida faqat bir martagina chiqib ketgan. Bu ishni Moyes o'zining ilk mavsumidayoq amalga oshira oldi.

20. “Stouk” fevralda 1984 yildan beri birinchi marta “Manchester Yunayted”ni mag'lub etdi.

21. “Olimpiakos”ga CHempionlar Ligasi 1/8 finali bosqichining birinchi o'yinida mag'lub bo'lib, “Yunayted” o'z tarixida birinchi marta grek klubiga yutqazdi.

22. “Manchester Siti”ga qarshi o'z maydonida 0:3 hisobida mag'lub bo'lgan MYU premer-liga tarixida birinchi marta o'yinning ilk daqiqasidayoq gol o'tkazib yubordi.


davomi bor...

Abror Qodirov tayyorladi.