Mirjalol Qosimov: “Yanada ko'proq gol urishimiz kerak edi”

"Birinchi bo'lim biz uchun yaxshi boshlandi. Tezda uchta gol urishga erishdik. Zaxiradan tushgan futbolchilar o'yinga qo'shilib keta olishmadi. Gollar sonini ko'paytira olmadik. Ikkinchi bo'limda shoshildik va ko'p xatoga yo'l qo'ydik. Yanada ko'proq gol kerak edi, lekin baribir natijadan qoniqdim. Afg'onistonga qarshi bahsda yanada yaxshiroq o'ynamoqchimiz", - deydi Mirjalol Qosimov.

- Dastlabki gol urilgan vaqtda bangladeshlik futbolchi maydonda yotgandi. Bu FIFA qoidalariga zid kelmaydimi?
- Biz doim FIFA qoidalariga bo'ysunamiz. Lekin ko'rgan bo'lsangiz raqibimiz ilk daqiqalardan o'yin vaqtini cho'zishga urindi. Bundan tashqari gol urilgan vaqtda futbolchimiz uni yotganini ko'rgani yo'q. Aks holda to'p maydon tashqarisiga chiqarib yuborilgan bo'lardi.

- O'zbekiston ilk turda ham g'alaba qozonmoqchi edinglar. Ammo durang bo'ldi. Bu sizlarga bugun yanada jahl bilan o'ynashga undadimi?
- Har bir o'yinga jiddiy tayyorgarlik ko'ramiz. Birinchi o'yinda ham futbolchilarim harakat qilishdi. Ammo Gonkong yaxshi himoyalandi, himoyalanayotgan jamoaga qarshi o'ynash doim og'ir. Bugun ham Gonkong ko'p vaqtini himoyada o'tkazdi.

- Gonkong bilan o'yinda ham bugun ham Rashidovning qanoti faol bo'ldi. Bu siz tomondan berilgan ko'rsatmami?
- To'rtta yarim himoyachi bilan o'ynadik. Farruh Sayfiev ko'proq hujumchilarga yordam berishi kerak edi. SHu bois Kozak ko'proq chapda o'ynadi.

- Afg'onistonga qarshi o'yinda zaxiradagilarni sinab ko'rish imkoni bormi. Sababi musobaqa uzoq davom etadi...
- "A" guruhida Janubiy Koreya birinchi o'rinda bormoqda. SHu bois guruhdan chiqib mezbonlarga qarshi o'ynashni istamasdik. SHu bois biz birinchi o'rinni olmoqchimiz. Ammo Afg'onistonga qarshi o'yinga qadar asosiy tarkib futbolchilarga dam beramiz.


Nodirxo'ja Yuldashev
Incheon