Milan Mitrovich: “Futbol hayotga o'xshaydi - hamma narsa rejadagidek ketavermaydi”

"So'g'diyona" jamoasining serbiyalik darvozaboni Milan Mitrovich "Bunyodkor"ga qarshi bahs oldidan Superligadagi holat, jamoaning so'nggi o'yinlari va shaxsiy holati haqida fikr bildirdi. 

— Turnir jadvalida pastki pog'onalarda turganimiz, albatta, yoqimsiz holat. Lekin agar birinchi turdan to bugungi kungacha bo'lgan o'yinlarimizni tahlil qilsak, biz har bir bahsda harakat qildik, hujumlar yaratdik va raqib darvozasi oldida xavfli vaziyatlar tashkil etdik. Menimcha, jamoa ko'p o'yinlarda mag'lubiyat va yo'qotilgan ochkolarga loyiq emas edi. Lekin futbol hayotga o'xshaydi — hamma narsa ham rejadagidek ketmaydi. Eng muhimi, ishonchni yo'qotmasdan mashg'ulotda qattiq mehnat qilish va natija, albatta, keladi.

— Chempionatda ikki, Kubokda esa bir o'yinda ishtirok etdim. Bilasizlar, jarohat tufayli ikki oylik tanaffus qilishimga to'g'ri keldi. Endi esa  hammasi yaxshi va jamoaga yordam berish uchun tayyorman. Har yili chempionat boshqacha bo'ladi. Agar 2018 va 2025 yillarni solishtirsak, katta farq bor — bugungi kunda kuchsiz jamoa degan tushuncha deyarli yo'q. Har qanday jamoa istalgan raqibni mag'lub etsa bo'ladi. Bu esa musobaqani yanada qiziq va kurashlarga boy qiladi.

— Ha, ketma-ket ikki o'yinda g'alaba qozondik va shu ruhda davom etamiz. Keyingi uchrashuvga tayyorgarlik har doimgidek olib borilyapti — taktik, jismoniy va ruhiy jihatdan puxta ish olib boryapmiz. Har birimiz maydonda bor kuchimizni berishga tayyormiz.