"Men faqat "Nasaf" haqida o'ylamoqdaman" - Marko Stanoevich final oldidan

Mazkur bahs Samarqanddagi  "Dinamo" stadionida bo'lib o'tadi. O'yin oldidan ikki jamoada ham jiddiy yo'qotishlar borligini bilasiz. "Nasaf"ning etakchisi Marko Stanoevich bugun jamoasiga yordam bera olmaydi. Biz bu borada finaldan oldin serbiyalik yarim himoyachining fikrlarini tingladik. 

- Marko bugun jamoangiz uchun juda muhim kun. Ikki jamoa deyarli bir xil holatda. SHunday ekan finaldan qanday o'yin kutyapsiz? Extiyotkorlik asosiy planda bo'ladimi?

- Bugun qaysidir manoda futbol bayrami, desam to'g'ri bo'ladi. Finallar doim muxlislar etiborini o'ziga jalb qilib kelgan. Kecha esa ishqibozlar uchun haqiqiy tantanali jarayonlar bo'lib o'tdi. Bugun esa uning davomini ko'ramiz. Umid qilamanki, ikki jamoa chiroyli futbol ko'rsatadi. Natija qanday bo'lishini yakunda ko'ramiz.

-  "Paxtakor"da Dragan CHeran, "Nasaf"da esa siz ishtirok eta olmaysiz. Ikki do'st finalni birga tomosha qiladimi?

- Bunday masuliyatli pallada jamoanga yordam bera olmaslik juda qiyin. Maydon tashqarisida kuzatish undan ham murakkab. O'zbekiston futbol associaciyasi o'yinga ruxsat berishiga umid qilgandik. CHunki mavsumning so'nggi o'yini qoldi. Lekin bunday bo'lmadi. Ko'ramiz, CHeran mendan uzoqlashib ketmasa, finalni birga tomosha qilamiz (kuladi).

-  "Nasaf" uchun mavsum hali tugamadi. SHunday bo'lsada, uzoq yo'lni bosib o'tdi. Superliga, OFK kubogidan qanday xulosalar yuzaga keldi?

- Mavsum juda qiyin o'tdi. O'zimiz ishtirok etgan musobaqada g'olib chiqib muxlislarni xursand qilmoqchi edik. Bugun bizda sovrin yutish uchun oxirgi imkoniyat qolgan. 

- "Nasaf" bilan shartnomangiz yil oxirida tugaydi. Keyingi rejalashtiringizdan nimalar o'rin olgan?

- Men faqat "Nasaf" haqida o'ylamoqdaman. Jamoada qolishdan xursand  bo'lardim. Boshqa takliflar kelib tushmadi.

Abdulaziz Iskandarov suhbatlashdi