Kaxi Maxaradze: "Al Ayn" to'sig'idan o'tish uchun bor kuchni ishga solamiz"

"Temiryo'lchilar" navbatdagi bosqichda BAAning "Al Ayn" klubiga qarshi bahs olib borishadi. Biz ushbu yangilik hamda boshqa mavzular yuzasidan "Loko" etakchilaridan biri Kaxi Maxaradzening fikrlari bilan qiziqdik.

- Kaxi, OCHL qura natijalari haqida nima deya olasiz?
- Bizga kuchli raqib tushdi deyishim mumkin. "Al Ayn" haqida ozmi-ko'pmi bilaman, chunki bu jamoaga qarshi o'tgan yil "Paxtakor" safida o'ynaganman. Safarda 1:1 hisobini qayd etgandik. "Lokomotiv" ham dastlabki uchrashuvni safarda o'tkazadi va umid qilamanki, natija biz uchun ijobiy ko'rinish oladi. "Al Ayn" to'sig'idan o'tish uchun bor kuchni ishga solamiz.

- Narigi juftlikda "Al Jayish" hamda "Al Nasr" bahs olib boradi. Bunda kimning imkoniyatlarini yuqori baholaysiz?
- Buyog'iga kuchsiz jamoaning o'zi qolmadi. "Al Nasr" bilan bu yil bir guruhda kurash olib bordik va ular ham yaxshi jamoa. Agar yarim finalga chiqsak, balki yana shu klub bilan o'ynarmiz.

- "Lokomotiv" Kubok o'yinida "Uz-Dong-Ju"ni 9:0 hisobida mag'lub etdi. SHunday hisob bo'lishini kutganmidingiz?
- Yo'q, albatta. Men raqib darvozasiga to'rtta-beshta gol uramiz deb o'ylagandim. Ammo 9:0ni hech kim kutmagan bo'lsa kerak.  

- Yana ikki kundan so'ng "Lokomotiv" "Buxoro"ga qarshi maydonga tushadi. Raqib haqida nima deya olasiz?
- To'g'risini aytsam, bu yil hisobidan "Buxoro"ning hech qaysi o'yinini to'liq ko'rmadim. Ammo raqib safida yaxshi futbolchilar borligini bilaman. Bejizga bu jamoa "Paxtakor"ni Kubok bahslaridan chiqarib yuborgan yo'q.

- Kaxi, nima deyb o'ylaysiz, "Lokomotiv"ga markaziy himoyachi kerakmi?
- Bu savol menga emas, murabbiylar shtabiga berilgani maqul. To'g'ri, oxirgi o'yinlarda himoyachi sifatida o'ynayapman va bu men uchun qiyinchilik tug'dirayotgani yo'q. Muhimi, darvozada turmasam bo'lgani, maydonning istalgan chizig'ida to'p tepishga harakat qilaman.

"Lokomotiv" PFK matbuot xizmati.