Ilhom Mo'minjonov: “Taktik sxemani o'zgartirganimiz ish berdi”

- Birinchi navbatda bugungi bayram bilan barcha yurtdoshlarimizni o'zim va klubimiz nomidan tabriklayman. Bevosita o'yin borasida gapiradigan bo'lsam, g'alabamiz muxlislarimiz uchun bo'ldi. Uchrashuvda jamoamizni qo'llab-quvvatlagani o'yingohga kelgan ishqibozlarimizga rahmat aytaman. Birinchi davrada o'z maydonimizda o'tkazilgan uchrashuvlarda ko'p o'yinlarda durang qayd etganimiz va bizni natijalarimizga sabr qilib, murabbiylar shtabiga ishonch bildirishgani uchun minnatdorchilik bildirib o'taman. Keyingi o'yinlarda ham “Navbahor”ni kuchlilar safiga qo'shilishi uchun bor imkoniyatlarimizni ishga solib, ularni yanada xursand qilishga harakat qilamiz.

- Oston O'runov o'yinga kirishib keta olmagandek taassurot qoldirdi. Oybek Qilichev esa futbolchilarni ko'p aldamoqda. Bu borada Sizning fikringiz qanday?

- Oston O'runov yosh futbolchilardan biri sanaladi. Sekin-asta uni tarbiyalab toblab bormoqda. Futbolchimiz yosh bo'lishiga qaramay maydonda katta xajmdagi ishni amalga oshirdi. Uchrashuvni tahlil qilib chiqqanimizdan keyin ham  Ostonni munosib tarzda to'p surgani aniqlanadi, deb o'ylayman. Oybek Qilichevga borasidagi savolga kelsak, Oybek o'yinni o'z qo'lida ushlab turdi. Aynan uning xatti-harakatlari samarasi o'laroq muhim g'alabani qo'lga kiritdik. To'g'ri, qaysidir vaziyatda Qilichev to'pni o'zida ko'proq ushlab qolgan bo'lishi mumkin.  Lekin uning harakatlari jamoamiz foydasiga ishladi. Bugungi kunda ushbu futbolchimiz mamlakatimizdagi etakchi yarim himoyachilardan biri sanaladi.

- Uchrashuvdan oldingi rejalarni barchasini maydonda amalga oshirishni imkoni bo'ldimi?

- “Paxtakor” jamoasining so'nggi o'yinlarini jiddiy tarzda o'rganib chiqqandik.  Birinchi bo'limda ko'proq raqibga o'ynash imkoniyatini berdik. Tanaffusdan keyin esa boshqa uslubda to'p surishni maqsad qilgandik. Murabbiylarimiz bilan raqibni o'rganish chog'ida shunday to'xtamga kelgandik. “Paxtakor” “Lokomotiv” bilan o'tgan murosasiz o'yinda g'alaba qozongan bo'lsada ikkinchi bo'limning ikkinchi qismini bo'shroq o'tkazgandi. Aynan shundan kelib chiqqan holda taktika tanlagandik. Yordamchim Vladimir Andreev bugun ertalab, “Paxtakor” o'yinini o'rganib chiqib boshqacha taktik uslubda to'p surishimizni maslahat berdi. Agarda etibor bergan bo'lsangiz, 23-turga qadar 4-2-3-1 taktik sxemasi asosida o'ynab kelayotgandik. Bugun esa 4-1-4-1 taktik sxemasini qo'lladik. O'yin uslubini o'zgartirganimiz va futbolchilarimiz o'z oldilariga qo'yilgan vazifani munosib tarzda bajarganliklari sababli g'alabaga erishib, namanganlik muxlislar oldida yuzimiz yorug' bo'ldi.