"Dinamo"dan tushunarsiz qaror

O'tgan mavsumni Proligada o'tkazib, Superligaga qaytgan "Dinamo" katta niyatlar bilan yangi mavsumga kirishdi. Ammo tushunarsiz qarorga ko'ra, jamoani Superligaga qaytargan Hakim Fuzaylov istefoga chiqarilib, o'rniga serbiyalik Predrag Rogan taklif etildi. 

Lekin Superliganing 9ta turi ortda qolib, Predrag Rogan ham ishdan olingani elon qilindi. Buni hech ikkilanmasdan tushunarsiz qaror desa bo'ladi. 

Birinchidan, "Dinamo" bu yil Superligaga qaytdi va Proligadan chiqqan jamoa birdaniga natija ko'rsata olmaydi. O'tgan yil buni "Turon" misolida ko'rdik. 

Ikkinchidan, "Dinamo" super darajadagi moliyaviy imkoniyatga ega emas. Klub haminqadar o'z aravasini tortib yuribdi. 

Uchinchidan, "Dinamo" super transferlarni amalga oshirmadi. Qozonda bori cho'michga chiqadi deganlaridek, hozirgi tarkib bilan osmondagi oyni orzu qilish amrimahol. 

To'rtinchidan, "Dinamo" rahbariyati xorijdan murabbiy olib keldimi, unga vaqt berishi kerak edi. 

Raqamlarni yana davom ettirsa bo'ladi. Biz faqat asosiylariga to'xtaldik. "Dinamo" rahbariyatining bu qarori rahbariyat faqat natija ortidan quvishini, klubda futbol g'oyasi hamda uzoqni ko'zlagan reja yo'qligini ko'rsatib berdi.

Ha, to'g'ri "Dinamo" shu paytgacha faqat bir marta g'alaba qozondi va jamoa 6 ochko bilan quyi o'rinlarda boryapti. 9ta o'yinda 1 g'alaba, 3 durang va 5 mag'lubiyat. To'plar nisbati 7-11. 

Lekin bir tahlil qilib ko'raylik, "Dinamo" o'zi shu paytgacha kimlar bilan o'ynadi? Qaerda qo'pol xatoga yo'l qo'ydiki, rahbariyat hatto birinchi davra tugashini kutmasdan murabbiyni olib tashladi?

1-tur. "Dinamo" - "Paxtakor" 0:2

Mavsumning dastlabki o'yinida amaldagi chempiondan 0:2 hisobidagi mag'lubiyatni tushunsa bo'ladi. Qolaversa, "Paxtakor" mavsum boshida hozirgidan kuchli edi. 

2-tur. "So'g'diyona" - "Dinamo" 1:0

Jizzaxdan ochko olib qaytish oson emas. SHu bois kichik mag'lubiyatni to'g'ri qabul qilsa bo'ladi. Bu o'rinda "So'g'diyona" o'tgan yil 2-o'rinni egallab, o'z tarkibini saqlab qolganini ham unutmaylik. 

3-tur. "Dinamo" - "Qizilqum" 0:0

O'z tarkibiga "Lokomotiv"ning etakchi sobiq futbolchilarini yig'ib olgan "Qizilqum" bilan durangni ham tushunsa bo'ladi. Axir raqib safida bir necha bor O'zbekiston chempioni bo'lgan futbolchilar bor. 

4-tur. "Bunyodkor" - "Dinamo" 2:1

"Dinamo" Toshkentda "Bunyodkor"ga qarshi chiroyli o'yin namoyish etdi, biroq oxirgi daqiqada o'tkazib yuborilgan gol tufayli alamli mag'lubiyatga uchradi. Aslida jamoa ko'rsatgan o'yin durangga loyiq edi. 

5-tur. "Dinamo" - "Lokomotiv" 3:1

"Dinamo"ning joriy mavsum ilk hamda hozircha yagona bo'lib turgan g'alabasi uyda "Lokomotiv" bilan qo'lga kiritildi. Aytish mumkinki, samarqandliklarning eng chiroyli o'yini shu bahsda ro'y berdi. 

6-tur. "Dinamo" - "Neftchi" 1:1

Proligadan chiqqan ikkita jamoa qarama-qarshiligi durang bilan yakun topdi. Balki mezbonlar shu o'yinda ham g'alaba qozonishlari kerakmidi?

7-tur. "Olimpik" - "Dinamo" 1:1

Dinamo 7-turni ham Proligadan chiqqan jamoaga qarshi o'tkazib, safarda "Olimpik" bilan durang o'ynadi. Tarkiblardan kelib chiqqan holda mehmonlar g'alaba qozonishlari mumkin edi desa bo'ladi. 

8-tur. "Dinamo" - "Navbahor" 0:1

O'z maydonida chempionlik uchun kurashayotgan "Navbahor"ni qabul qilgan "Dinamo" 90+4-daqiqada gol o'tkazib, alamli tarzda imkoniyatni boy berdi. O'sha gol bo'lmaganida jamoa yana bir ochkoga ega chiqqan bo'lardi. 

9-tur. "Metallurg" - "Dinamo" 2:1

Bekobodda olti ochkolik bahs bo'ldi. CHunki jamoalar turnir jadvalida ketma-ket o'rinlarda borayotgandi. Og'ir kechgan o'yinda "Dinamo" alamli mag'lubiyatga uchradi. Uchrashuvda Oybek Nurmatov hisobni ochgani bilan maydon egalari 90+4 va 90+7-daqiqalarda to'p kiritib, g'alabani ilib ketishdi. O'yinda "Dinamo" vaqtni ko'p cho'zgani haqida rosa gapirildi. Lekin unutmang, jamoa 49-daqiqada Evgeniy CHumak qizil kartochka olishi sababli bir kishi kam bo'lib qolgandi. Endi mehmonda o'ynayotgan jamoa baribir vaqtni cho'zishga harakat qiladi. Ammo bu "qiliq" qimmatga tushdi. 

SHipilov nima qilib beradi? 

Aytish mumkinki, hech narsa. Balki natija yaxshi tomonga o'zgarar. Lekin serbiyalik murabbiy Predrag Rogan jamoaga o'z falsafasini olib kirayotgandi. Nimanidir o'zgartirishga harakat qilayotgandi. Eng muhimi, murabbiyda futbol g'oyasi borligi sekin-asta ko'zga tashlanayotgandi. Ishqilib SHipilov borini ham yo'q qilib, hammasini rasvo qilmasa bo'lgani. 

Barsa Bloger.