Dilshod Karimov: "Paxtakor" yana o'z akademiyasi tarbiyalanuvchilariga to'ldi"

Asosiy tarkibda Hojiakbar Alijonov (1997), SHahzod Azmiddinov (2000), Muhammadqodir Hamraliev (2001), Sardor Sobirxo'jaev (1994), Abbos Fayzullaev (2003) maydonga tushirildi. Ikkinchi taymda esa Po'latxo'ja Xoldorxonov (2003), Behruz Asqarov (2003), Diyor Xolmatov (2002) va Rustam Turdimurodov (2004) o'yinga qo'shildi. SHuningdek, SHahzod Rahmatullaev (2003) va Abubakir Ashurov (2003) qaydnomadan joy oldi. Guvohi bo'lganingizdek, jamoa kecha 20 o'yinchidan iborat qaydnomada 11 nafar akademiya futbolchisidan foydalandi. 

"Mana sekin biz istagan jamoa shakllanib boryapti. Kecha qayd etilgan natija anchadan beri klubimizda bo'lmayotganini aytishdi. Xursand bo'ldik, klub yana o'z akademiyasi tarbiyalanuvchilariga to'ldi", – dedi jamoa raisi o'rinbosari Dilshod Karimov.

Mutaxassis so'zida davom etar ekan, quyidagilarni qo'shimcha qildi:

- Ko'pchilik "Paxtakor"ni boshqa jamoalardan kelgan o'yinchilar evaziga tuzilgan jamoa deyishga urinmoqda. Farruh Sayfiev, Eldor Suyunov, Odil Hamrobekov, Sanjar Quvvatov, Sardor Rashidov, Aziz Turg'unboev va Doston Hamdamov kabi futbolchilar qonida allaqachon "sherlar" qoni oqyapti. Ular aynan bizning jamoaga kelib yanada o'sdilar. "Paxtakor" ruhiyati ularning, keyinchalik MTJning asosiy tarkib o'yinchilaridan biriga aylanishlariga turtki bo'ldi. Bu futbolchilar akademiyadan chiqayotgan yosh avlodga o'zlarining boy tajribalarini o'rgatyaptilar. CHeran kabi legionerga, menimcha, O'zbekistondagi istalgan klub muhtoj. Bugun qaydnomadan 11 nafar futbolchi o'rin olgan bo'lsa, maqsadimiz yana ikki yildan keyin ular sonini 15-16 nafarga chiqarish. Bu borada U-21, U-19 va akademiyaning qolgan yoshlariga homiylar yordamida etiborni keskin oshirganmiz. 

Maksim SHackix haqida:

- Uning yaxshi jihatlaridan biri, klub akademiyasi tarbiyalanuvchilarining xizmatlaridan foydalanayotgani. Aslida har qanday rivojlanayotgan klub, avvalo, o'z akademiyasiga etiborni qaratish kerak.