“Bu optimal tarkib emas. Hakam qarorlari to'g'ri edi, mag'lubiyatni tan ola bilish ham kerak" - Sanat Shixov Eron bilan o'yin haqida

Uning fikricha, mazkur o'yin nafaqat natija, balki tarkib va yangi futbolchilar imkoniyatlarini baholash nuqtayi nazaridan katta ahamiyatga ega bo'ldi.

— Bu musobaqa biz uchun nomzod futbolchilarni ko'rib olish uchun juda yaxshi imkoniyat bo'ldi. Bunday o'yinlar yangi futbolchilarni bosim ostida qanday o'yin ko'rsatishini ko'rsatib beradi — dedi Shixov.

U Temur Kapadzening hujumkor taktikasiga to'xtalib o'tdi:

— Timur Kapadze futbolchilarimizning imkoniyatlarini yaxshi biladi, taktikasi hujumkor. Albatta, Eron 115 daqiqa davomida bir kishi kam o'ynadi. Lekin shunga qaramasdan, futbolchilarimiz raqibni himoyaga butunlay o'tirib qolishiga majbur qila olishdi. 

Shixov tarkib va himoyadagi harakatlarni ham yuqori baholadi:

— Hali bu tarkibni optimal deb bo'lmaydi. Jahon chempionatiga qadar eng kuchli tarkib aniq bo'ladi. Asosiy himoyachimiz Abduqodir yo'qligiga qaramasdan, himoyachilarning ishonchli o'ynagani meni xursand qildi.

Sobiq futbolchi hakamlar faoliyati haqida ham fikr bildirdi:

— O'yinda VAR tizimi ishladi va hakamlar har bir vaziyatni ko'rib chiqib qaror qabul qilishdi. Menimcha, ularning qarorlari to'g'ri bo'ldi. Bu esa terma jamoamizning g'alabasi haqqoniy emasligini bildirmaydi. Futbolda shunday holatlar bo'ladi. Raqib qoidalarni hurmat qilishi shart. Professional sportchilar mag'lubiyatni tan olishni bilishi kerak, hakam yoki boshqalarni ayblash to'g'ri emas.

Shixovning so'zlariga ko'ra, O'zbekiston hujumchilarining salohiyati Osiyo miqyosida yuqori baholanadi:

— Hujumchilarimiz Osiyoda eng kuchlilardan. Kanotlardagi vingerlarimiz ham tezkor. Shuni hisobga olib, imkoniyatlarimizni yuqori baholayman, — deya xulosa qildi u.