Davron CHoriev: "Tojikiston Yaponiyaga etarlicha tashvish tug'dirdi"

 Bahodir Ahmedov shogirdlari “B” guruhi 2-turi doirasida Tojikiston futzalchilariga qarshi bahs olib boradi.

Janubiy Koreyaga bilan bo'lib o'tgan bellashuvda xet-trik muallifiga aylangan Davron CHoriev O'FF matbuot xizmatiga bo'lajak o'yin oldidan o'z fikrlarini bildirdi.

“Janubiy Koreyaga qarshi yaxshi o'yinimizni namoyish qila oldik. Ishonchli g'alabadan keyin jamoada ijobiy kayfiyat hukmronlik qilmoqda. Ertangi bellashuvga qarshi jiddiy tayyorgarlik ko'rdik. Nasib qilsa, bu o'yinni ham g'alaba bilan tugatamiz.  



Aytish kerakki, so'nggi ikki yil ichida Tojikiston futzal termasining saviyasi ancha oshdi. Bo'lajak raqib bilan o'rtoqlik o'yini o'tkazganmiz, ularning nimalarga qodir ekanidan xabardormiz. Janubiy Koreyaga qarshi bellashuvdan keyin Yaponiya va Tojikiston o'yinini sport majmuasidan turib kuzatdik. Ertangi raqibimiz Yaponiyaga etarlicha tashvish tug'dirganiga hamda jismonan baquvvat ekaniga guvoh bo'ldik.

Tojikistonga qarshi o'yin oson kechmaydi, buni hammamiz yaxshi tushunib turibmiz. Ammo oldimizga yuqori maqsadli vazifalar qo'yilgan va bizga bildirilgan ishonchni oqlashga harakat qilamiz. 2016 yili Toshkentda o'tkazilgan Osiyo chempionatida, 2017 yili Turkmanistonda bo'lib o'tgan Yopiq inshootdagi Osiyo o'yinlarida vice-chempion bo'ldik. Umid qilamanki, bu safar qita chempionligini qo'lga kiritamiz”, – dedi Davron CHoriev.