Burkina-Faso kecha “Paxtakor” stadionida mashg'ulot o'tkazdi

Kecha milliy termamiz “Paxtakor” maydonida bugungi o'yin oldidan mashg'ulot o'tkazganidan so'ng, Burkina-Faso milliy terma jamoasi stadionda jam bo'ldi. Bugungi raqiblarimiz mashg'ulot o'tkazishdan oldin maydonni har tomonlama o'rganib chiqishdi. Bu Burkina-Faso terma jamoasining Toshkentdagi ilk mashg'uloti edi. Avvaliga ular tanasini qizdirib olish uchun jismoniy mashg'ulot o'tkazishdi.

SHundan so'ng futbolchilar murabbiyning ko'rsatmasi bilan to'plar bilan ishlay boshlashdi. Ularning kayfiyatlari alo darajada ekanligi shundoq ko'rinib turar edi. Bugungi uchrashuv o'rtoqlik maqomida o'tsada mashg'ulotlarga jiddiy etibor qaratishdi. Ular asosan qanotlardan hujum boshlash rejasi asosida harakat qilishdi. Raqiblarimiz tarkibida bo'yi baland bo'lgan futbolchilar ko'pligi sababli ikkinchi qavatda qanday o'ynash kerakligi borasida ham mashqlar olib borishdi.

Umumiy mashg'ulotlar yakunlanish arafasida terma jamoa bosh murabbiyi Paulo Duarte shogirdlarini ikkiga ajratgan holda futbol o'ynatdi. Burkina-Faso termasi bugungi o'yinga jiddiy tayyorgarlik ko'rdi. Ishonamizki, milliy terma jamoamizning ushbu o'yinga tayyorgarligi bulardan qolishmagan.

Eslatib o'tamiz, O'zbekiston - Burkina-Faso uchrashuvi bugun, 24 avgust kuni soat 20:00da "Paxtakor" stadionida bo'lib o'tadi.

Jahongir Sotvoldiev