O'tmishga nazar. 20 yil muqaddam bir kishi kam O'zbekiston yoshlar o'rtasidagi JCHda Argentinaga yutqazgan

2003 yil Birlashgan Arab Amirliklarida o'tkazilgan 20 yoshgacha bo'lgan futbolchilar o'rtasidagi jahon chempionatida Viktor Borisov murabbiyligidagi O'zbekiston yoshlar terma jamoasi ham ishtirok etgan. Ushbu mundialda debyut qilgan hamyurtlarimiz "B" guruhida Argentina, Ispaniya va Mali terma jamoalariga ro'baro' kelgan. 

Ilk o'yinda Maliga 2:3 hisobida imkoniyatni boy berib qo'ygan vakillarimiz turnirning 2-turida Argentinaga qarshi maydonga tushadi. SHarjada 8500 tomoshabin ishtirokidagi bahs O'zbekiston uchun omadli tarzda boshlandi — uchrashuvning 4-daqiqasidayoq Aleksandr Geynrix hisobni ochishga muvaffaq bo'ldi. Birinchi bo'lim bizning foydamizga hal bo'ldi. 

Ikkinchi bo'limda esa argentinaliklar o'yinni o'z foydasiga hal qilishdi. Bunga 54-daqiqada Islom Inomovga ikkinchi sariq kartochka ko'rsatilishi ham sabab bo'ldi. Dastlab 70-daqiqada Leandro Fernandes jarima maydonchasida ichidan oshirilgan to'pni bo'sh qolgan darvozaga kiritgan bo'lsa, uchrashuvning 90+2 daqiqasida German Errera hujumda Ignatiy Nesturov bilan to'qnashib ketadi, senegallik hakam esa bu vaziyatda 11 metrli nuqtaga ishora qiladi. Fernando Kavenagi penaltini aniq ijro etib, so'nggi lahzada g'alabani ilib ketadi. 

Borisov shogirdlari guruhdagi oxirgi bellashuvda Inesta tomonidan urilgan gol evaziga Ispaniyaga yutqazib, musobaqa bilan xayralashadi. Ispaniya o'sha mundialda finalga qadar etib borib, hal qiluvchi bahsda Braziliyaga mag'lubiyatga uchragan. Argentina esa musobaqada to'rtinchi o'rin bilan cheklangan.

U-20 jahon chempionati

1 dekabr, 2003 yil

"SHarja" stadioni, SHarja, BAA

O'zbekiston — Argentina 1:2

Gollar: Aleksandr Geynrix (4) — Leandro Fernandes (70), Fernando Kavenagi (90+3, penaltidan)

O'zbekiston: 12.Ignatiy Nesterov, 5.Muzaffar Holiqov (13.Kamoliddin Tojiev, 75), 2.SHavkat Raimqulov, 4.Yaroslav Krushelnickiy (s), 20.Ilhom Suyunov (8.Nodir Qo'ziboev, 74), 18.Islom Inomov, 3.Rustam Qodirov, 7.Mansurjon Saidov, 10.Ilyos Zeytullaev, 9.Aleksandr Geynrix, 14.Marat Bikmaev (11.Eldor Magdeev, 66)

Zaxira: 1.Timur G'aniev, 6.Jasur Hasanov, 15.Konstantin Boev, 16.Bahriddin Vahobov, 17.Vladimir Anikin, 19.Timur Sultonov

Bosh murabbiy: Viktor Borisov

Argentina: 1.Gustavo Eberto, 2.Gonsalo Rodriges, 4.Maurisio Romero, 6.Leandro Fernandes, 5.Xaver Maskerano, 8.Xyugo Kolache (17.Xose Sosa, 65), 3.Osmar Ferreyra (11.Marselo Karruska, 56), 16.Neri Kardoso (19.German Errera, 39), 18.Uolter Montilo, 20.Franko Kanjele, 9.Fernando Kavenagi

Zaxira: 7.Pablo Sabaleta, 12.Mariano Barbosa, 13.Joel Barbosa, 14.Jonatan Bottinelli, 15.Uolter Garsiya

Bosh murabbiy: Xyugo Tokalli

Ogohlantirishlar: Islom Inomov (21), Neri Kardoso (29), Osmar Ferreyra (41), Mansur Saidov (47), Aleksandr Geynrix (54), Xaver Maskerano (60), Franko Kanjele (70), Ilyos Zeytullaev (83), Leandro Fernandes (84), Gonsalo Rodriges (87)

CHetlatish: Islom Inomov (54, ikkinchi ogohlantirish)

Afsuski, topilgan videolavhadan Geynrixning goli o'rin olmagan ekan.