Bugun futbol. "Nasaf" - "Qo'qon-1912"

Turnir jadvalida ikkinchi o'rinni egallab turgan "Nasaf" o'z maydonida 4-o'rinda borayotgan "Qo'qon-1912"ni qabul qiladi. 21ta o'yin o'tkazgan "Nasaf" 43 ochko to'plagan, qo'qonliklar esa 21 o'yindan so'ng 38 ochko jamg'arishgan. Demak, jamoalarni 5 ochko ajratib turibdi.

"Nasaf" ayniqsa ikkinchi davrada ancha sermahsul o'yin namoyish etib kelmoqda. Xususan "ajdarlar" mavsumning ikkinchi yarmi boshlanganidan beri hali mag'lub bo'lishmadi: 6ta g'alaba va ikki durang. 

"Qo'qon-1912"ga kelsak, Baxtiyor Ashurmatov shogirdlari ikkinchi davra start olganidan beri to'rtta o'yinda zafar quchishdi. Bu jamoaning oxirgi 3 uchrashuvda ketma-ket g'alaba qozongani etiborga molik. Qo'qonliklarning qatorasiga uchta g'alabasi "Surxon", "Mashal" va AGMK bilan o'yinlarda qo'lga kiritildi. 

"Nasaf" esa oxirgi uchta o'yindan ikkitasida zafar quchdi. Ro'ziqul Berdiev shogirdlari uyda AGMK va safarda "Metallurg"ni mag'lub etishdi. Undan oldin safarda "Buxoro" bilan kechgan bahs 0:0 hisobida yakun topgandi. 

Yana bir qiziq malumot shuki, "Nasaf" ikkinchi davra boshlanganidan so'ng o'z darvozasidan faqat 1ta gol o'tkazdi. To'plar nisbati 18-1. Jamoa oxirgi uch o'yindan beri o'z darvozasi daxlsizligini saqlab kelmoqda. 

Bu "Qo'qon-1912" uchun ikkinchi davra hisobidan safardagi 6-bahs bo'ladi. Qo'qonliklar bungacha bo'lib o'tgan 5ta safar uchrashuvidan ikkitasida g'alaba qozonib, ikki bor mag'lub bo'lishgan, yana bitta uchrashuv durang bilan yakun topgan.