Bugun futbol. "Lokomotiv" - "Metallurg"

Turnir jadvalida "Lokomotiv" 35 ochko bilan ikkinchi o'rinni egallab turibdi. "Metallurg" hisobida esa 23 ochko bor va bu jamoa 8-o'rinda boryapti. 

Ikkinchi davrada beshta o'yin o'tkazgan "Lokomotiv" ikkitasini g'alaba bilan yakunlab, ikki bor durang o'ynadi va bir marta yutqazib qo'ydi. "Metallurg" esa uchta bellashuvda zafar quchib, ikki o'yinda imkoniyatni boy berdi. 

Navbatdagi bahs "Loko" uchun o'z maydonidagi 11-uchrashuv bo'ladi. "Temiryo'lchilar" uydagi 10ta o'yindan 8tasini g'alaba bilan yakunlab, ikki bor durang qayd etishgan. To'plar nisbati 22-5. "Lokomotiv" o'z maydonida yutqazmagan ikkita jamoadan biri bo'lib turibdi. Yana biri "Paxtakor". 

"Metallurg" uchun "Loko"ga qarshi bahs safardagi 10-uchrashuv bo'ladi. Bekobodliklar safarda shu paytgacha faqat bitta o'yinda g'alaba qozonishgan: 15-turda "Nasaf" 2:1 hisobida mag'lub etilgan. "Metallurg" shuningdek 4 martadan durang va mag'lubiyat qayd etgan. 

Bilasizmi? "Lokomotiv" o'z maydonida ketma-ket 4 uchrashuvdan beri faqat g'alaba qozonib kelyapti: "Surxon" (5:1), "So'g'diyona" (2:0), "Dinamo" (2:0) va "Nasaf" (1:0). Mana shu to'rtta uchrashuvda "Loko" raqiblar darvozasiga 10ta to'p kiritib, o'z darvozasidan bitta gol o'tkazib yuborgan. 

Fakt: "Metallurg" birinchi davrada safarda g'alaba qozona olmadi. Bu jamoa ikkinchi davrada "Nasaf"ni mag'lub etganini hisobga olsak, "Loko"ga qarshi ham keskin qarshilik ko'rsatishi kutilyapti. 

Eslatma: Bekobodda kechgan birinchi davra uchrashuvida 0:0 hisobi qayd etilgan. Toshkentda bo'lib o'tgan oxirgi 5 o'yinda quyidagi natijalar qayd etilgan. 

2018 yil. "Lokomotiv" - "Metallurg" 1:0 

2017 yil. "Lokomotiv" - "Metallurg" 3:1  

2016 yil. "Lokomotiv" - "Metallurg" 4:1 

2015 yil. "Lokomotiv" - "Metallurg" 1:1 

2014 yil. "Lokomotiv" - "Metallurg" 5:1 

Ko'rib turganingizdek, beshta o'yinning to'rttasida "Lokomotiv"ning qo'li baland kelgan. Faqat bir uchrashuv durang natija bilan yakun topgan. "Metallurg" "temiryo'lchilar" darvozasiga bittadan ko'p to'p kirita olmagan.

Coca Cola Superligasi. 19-tur

«Lokomotiv» - «Metallurg»

15 sentyabr. «Lokomotiv» stadioni. 18:30

Bosh hakam: Ahrol Risqullaev

Qanot hakamlari: Abduhamidillo Rasulov, Jahongir Saidov. 

Zaxira hakami: Abdurashid Xudoyberganov

Nazoratchi: Rashid Aytekov

Komissar: Abbos Ahrorov