Bugun futbol. AGMK - "Qizilqum"

Avvalo shuni aytish kerak, bugungi o'yin AGMK uchun oliy ligadagi 300-uchrashuv bo'ladi. Turnir jadvalida ikkala jamoa yonma-yon o'rinlarda bormoqda va har ikki klub bungacha 20 ochkodan jamg'argan.

AGMK o'tgan tur Qarshidan g'alaba bilan qaytdi, "Qizilqum" esa o'z maydonida "Buxoro"ga yutqazib qo'ydi. AGMK shu paytgacha o'z uyida 9ta uchrashuv o'tkazib, shundan faqat ikkitasida g'alabaga erishgan. Olmaliqliklar uyda "Lokomotiv" va "Buxoro"dan ustun kelishgan. To'rtta o'yinda durang qayd etilgan bo'lsa, uch marta jamoa imkoniyatni boy bergan. To'plar nisbati 7-7.

Ko'rib turganingizdek, AGMK o'z maydonida ko'p gol ura olmayapti. Bu jamoa safarda birmuncha ko'proq to'p kiritgan (11ta). AGMK oxirgi ikki turda g'alabaga erishdi va bugun ham zafar quchadigan bo'lsa, birinchi marta ketma-ket uchta uchrashuvda g'alaba qozongan bo'ladi.

Safarda 9 bor maydonga tushgan "Qizilqum" shundan uchtasida uch ochkoli bo'lgan. Jamoa safar o'yinlarida "So'g'diyona", "Qo'qon-1912" hamda "Neftchi"ni mag'lub etib qaytgan. "Qizilqum"ning safar uchrashuvlaridagi to'plar nisbati 8-11.

Navoiyda kechgan birinchi davra o'yinida maydon egalari 3:0 hisobida zafar quchishgan. Bu hozircha Hamidjon Aktamov shogirdlarining ushbu mavsum hisobidan yagona yirik hisobdagi g'alabasi bo'lib turibdi.