Bor kuch bilan o'ynasak, Xitoy kim bo'pti! (Yigitlarni g'alabaga undash haqida)

Futbolchilarimiz safarda Xitoy termasiga qarshi maydonga tushishadi. O'yin Toshkent vaqti bilan 17:00da boshlanadi. To'g'risini aytganda, hammamiz bu to'qnashuvdan faqat g'alaba kutyapmiz. Oldimizda ikkita o'yin qoldi va ikkalasini ham o'z foydamizga hal qilsak, marra - bizniki. O'zbekiston o'z tarixida ilk marta jahon chempionatiga chiqadi. 

Bungacha aksariyat muhim bellashuvlar oldidan doim vahima holatiga tushib qolganmiz. Bu vahima birinchi navbatda jamoamizning safarda o'ynashi bilan bog'liq. Biz ko'pincha terma jamoamiz safar o'yiniga borganda raqib haqida og'iz ko'pirtirib gapiramiz, ularning kuchini yuqori baholaymiz, bu esa futbolchilarga albatta o'z tasirini o'tkazadi. Lekin endi bunday gaplarni gapirmaymiz. Biz Xitoyni hurmat qilamiz, lekin ulardan qo'rmaymiz. 

Ularni o'tgan yil Toshkentda mag'lub etganmiz, nega endi safarda ham yuta olmas ekanmiz? Tarixga nazar tashlasak, Xitoydan bizdan aslo yaqqol kuchli bo'lmagan. O'zim ko'rgan o'yinlar orasida Xitoy faqat ikkita bellashuvda bizdan ustun bo'lgan xolos. Bu 2001 yil o'tkazilgan JCH-2002 saralash o'yini (Xitoy - O'zbekiston 2:0) hamda 2015 yil Avstraliyada bo'lib o'tgan Osiyo chempionatidagi Xitoy - O'zbekiston 2:1 uchrashuvi. Boshqa o'yinlarda Xitoyning bizdan ustunligini ko'rmaganmiz. 

O'tgan yil Toshkentda bu jamoani ko'rganmiz, kerak bo'lsa 2:0 hisobida yutganmiz ham. SHundan so'ng ularda bosh murabbiy o'zgarib, Marchello Lippi jamoani qabul qilib olgandi. Hozirda ko'pchilik Lippini gapiryapti, u kishi murabbiy sifatida jahon futbolida kuchli shaxs, ammo shuni unutmaylik, maydonga Lippi tushib o'ynab bermaydi. Maydonda o'tgan yil biz mag'lub etgan futbolchilar harakat qilishadi. 

Men eng avvalo futbolchilarimiz kuchiga ishonyapman. O'yinchilarimizning salohiyati, o'yini va texnikasi xitoyliklardan kuchli. Biz raqibni bemalol safarda ham mag'lub eta olamiz, faqat futbolchilarimiz o'z kuchlariga ishonishsa bas. Osiyodan bizdan kuchli faqat Avstraliya, Yaponiya, Eron va Janubiy Koreya bo'lishi mumkin, ammo boshqalar bilan bemalol o'ynasa bo'ladi. Faqat vahimaga tushmasak  bo'lgani. Eng birinchi navbatda bosh murabbiy Babayanning o'zi vahima qilmasligi kerak, chunki bu o'yinchilarga tasir qiladi. 

Bugun g'alaba biz tomonda bo'lishini qandaydir ich-ichimizdan sezib turibmiz. Go'yoki bu safar jahon chempionatiga chiqadigandekmiz. SHunisi yaxshiki, hammasi o'z qo'limizda. Qolaversa, raqiblar ham avvalgidek kuchli emas. Biz hozirgi holatda Xitoyni ham, undan keyin Koreyani ham bemalol mag'lub eta olamiz. CHunki bizdan ko'ra ular sarosimaga tushib qolgan. SHu paytgacha bo'lgan hamma gaplarni unutamiz va bor etiborni terma jamoani qo'llab-quvvatlashga qaratamiz. Nasib qilsa bugun soat 19:00dan bayramni boshlab yuboramiz. 

X.Xoliqov.